O‘zbekiston prezidenti matbuot xizmati fotosurati
Sirdaryo viloyatida umumiy quvvati 1573 MVt bo‘lgan energobloklar, shuningdek, Qoraqalpog‘istonda quvvati 200 MVt bo‘lgan shamol elektr stansiyasi (SHES) va 100 MVtlik energiyani saqlash tizimi foydalanishga topshirildi. Bu haqda O‘zbekiston prezidenti matbuot xizmati xabar berdi.
Loyihalar respublika mustaqilligining 35 yilligiga bag‘ishlangan, mamlakat bo‘ylab 163 ta yangi obyektni ishga tushirish marosimining bir qismi bo‘ldi. Marosim 25 avgust kuni prezident Shavkat Mirziyoyev ishtirokida o‘tkazildi.
Shu kuni jami 72 ta yirik sanoat va xizmat ko‘rsatish loyihasi, shuningdek, ijtimoiy sohaga oid 91 ta obyekt foydalanishga topshirildi. Ishga tushirilgan obyektlarning umumiy qiymati 50 trln so‘mdan (4,6 mlrd dollar) oshadi.
Energetika vaziri Sherzod Xo‘jayev aniqlik kiritishicha, Sirdaryo viloyatining Boyovut tumanida quvvati 1573 MVt bo‘lgan issiqlik elektr stansiyasi (IES) foydalanishga topshirildi. U yiliga 13 mlrd kVt·soat elektr energiyasi ishlab chiqaradi. To‘g‘ridan to‘g‘ri investitsiyalar asosida amalga oshirilgan loyihaning umumiy qiymati 900 mln dollarni tashkil etadi. Loyiha Fransiyaning EDF, Qatarning Nebras Power, Yaponiyaning Sojitz Corporation va Kyuden International kompaniyalaridan iborat konsorsium bilan hamkorlikda amalga oshirildi.
Qoraqalpog‘istonning Qorao‘zak tumanidagi SHES va energiyani saqlash tizimi 263 mln dollar evaziga bunyod etildi. Ular Saudiya Arabistonining ACWA Power kompaniyasi bilan hamkorlikda qurildi. SHES yiliga 701 mln kVt·soat elektr energiyasi ishlab chiqaradi.
Navoiy viloyatida ham yangi loyihalar amalga oshirildi. Xususan, Nurota tumanida quvvati 300 MVt bo‘lgan quyosh fotoelektr stansiyasi va 150 MVtlik energiyani saqlash tizimi qurildi. Loyihaning qiymati 390 mln dollarni tashkil etib, u Xitoyning China Energy Overseas Investment kompaniyasi bilan hamkorlikda amalga oshirildi. Bu yerda yiliga 657 mln kVt·soat elektr energiyasi ishlab chiqariladi. Bu 273 mingta xonadonning bir yillik «yashil» energiya iste’moliga teng.
Namangan viloyatining Uychi tumanida quvvati 100 MVt bo‘lgan, qiymati 110 mln dollarlik energiyani saqlash tizimi ishga tushirildi. Loyihani amalga oshirishda China Energy Overseas Investment kompaniyasi ishtirok etdi.
Shu kuni energetika sohasida jami 2423 MVt quvvat ishga tushirildi. Xo‘jayev ta’kidlashicha, ushbu loyihalarning barchasi o‘z kategoriyasi bo‘yicha Markaziy Osiyodagi eng yirik loyihalar hisoblanadi.
Ishga tushirilgan yangi quvvatlar mamlakat energetika tizimini mustahkamlash va kuz-qish mavsumida elektr tarmog‘iga tushadigan yuklamani kamaytirishga xizmat qiladi.
Qayd etish lozim, hukumat avvalroq 2030 yilga qadar respublikada to‘g‘ridan to‘g‘ri xorijiy investitsiyalar hisobidan umumiy quvvati 10,3 GVt bo‘lgan o‘nta yirik shamol elektr stansiyasini qurishni rejalashtirgan edi. Buning uchun 11 mlrd dollar miqdorida investitsiya jalb etilishi kutilgan. Ushbu obyektlar ishga tushirilgach, mamlakatda yiliga 35 mlrd kVt·soat ekologik toza energiya ishlab chiqariladi.
25 avgust kuni ishga tushirilgan boshqa muhim loyihalar qatorida to‘qimachilik, metallurgiya va oziq-ovqat sanoatidagi yangi ishlab chiqarish korxonalari ham bor.
Andijon, Namangan va Jizzax viloyatlarida eksportga yo‘naltirilgan to‘qimachilik, trikotaj va gilam mahsulotlari ishlab chiqarish fabrikalari ochildi. Samarqand va Toshkent viloyatlarida sanoat kooperatsiyasini rivojlantirish va import o‘rnini bosishga xizmat qiladigan metallurgiya korxonalari tashkil etildi.
Marosimda ijtimoiy obyektlarga ham alohida e’tibor qaratildi. Yangi o‘quv yili arafasida 36 ta bolalar bog‘chasi, 43 ta maktab, 7 ta oliy ta’lim muassasasi va 3 ta shifoxona foydalanishga topshirildi.
Jumladan, Toshkentda 10 gektar maydonda joylashgan va 7 ming talabaga mo‘ljallangan «Yangi O‘zbekiston» universiteti majmuasi foydalanishga topshirildi. Ushbu universitetda Garvard universiteti bilan hamkorlikda Rektorlar maktabi tashkil etilgan. Oksford universiteti bilan birgalikda davlat xizmatchilarining malakasini oshirish bo‘yicha “Ta’lim xabi” tashkil etiladi. 1 oktyabrdan Sun’iy intellekt instituti ish boshlaydi.
Qarshi shahrida 400 mlrd so‘m (33,3 mln dollar) mablag‘ evaziga 3 ming talabaga mo‘ljallangan Iqtisodiyot va pedagogika universiteti qurildi.
Toshkentda 30 ming kvadrat metr maydonga ega, besh qavatli Milliy kutubxona ochildi. Kutubxona fondida 200 mingdan ortiq kitob mavjud bo‘lib, u bir vaqtning o‘zida 1,5 minggacha kitobxonni qabul qila oladi.
Farg‘ona viloyatida zamonaviy tibbiyot muassasasi ish boshladi. U yiliga 60 ming nafar bemorni davolash va 30 ming nafar ayolni skriningdan o‘tkazishga mo‘ljallangan.
Prezident marosimda so‘nggi o‘n yilda O‘zbekiston iqtisodiyoti hajmi 2,5 barobardan ko‘proq oshganini ta’kidladi. Uning so‘zlariga ko‘ra, shu davrda sanoatga 160 mlrd dollar xorijiy investitsiya jalb qilingan, 2163 ta yirik sanoat obyekti ishga tushirilgan va qariyb 6 mln ta doimiy ish o‘rni yaratilgan.
«Biz xomashyo eksport qilgan davlatdan uni chuqur qayta ishlash zanjiri asosida tayyor mahsulotni jahon bozoriga olib chiqadigan iqtisodiyotga o‘tyapmiz. Eng muhimi, yangi korxonalar bilan birga zamonaviy texnologiyalar, yangi kasblar va yuqori malakali ish o‘rinlari ham paydo bo‘lmoqda», – dedi davlat rahbari.
Matbuot xizmati ma’lum qilishicha, faqat joriy yilning o‘zida O‘zbekistonda umumiy qiymati 1,7 mlrd dollar bo‘lgan 56 ta yirik sanoat va xizmat ko‘rsatish obyekti ishga tushirildi, 8,8 mingta ish o‘rni yaratildi.
Bu maqsadlar uchun davlat budjetidan 46 trln so‘m (3,8 mlrd dollar) mablag‘ ajratildi. 385 ta maktab, 113 ta bolalar bog‘chasi va 81 ta shifoxona qurildi hamda ta’mirlandi. Shuningdek, 7,5 ming kilometr avtomobil yo‘llari, 3,2 ming kilometr suv ta’minoti va kanalizatsiya tarmoqlari barpo etildi.
Marosim davomida Shavkat Mirziyoyev investorlar, tadbirkorlar, quruvchilar va loyihachilarga minnatdorlik bildirdi.
«Siz kiritayotgan har bir investitsiya O‘zbekiston kelajagining poydevorini mustahkamlaydi. Siz yaratayotgan har bir ish o‘rni oilalar farovonligiga xizmat qiladi» — deya prezident so‘zlarini keltiradi uning matbuot xizmati.
Tadbir barcha 163 ta obyektning ishga tushirilishini anglatuvchi ramziy tugmani bosish marosimi bilan yakunlandi.
