Gadji Gadjiyev. Ijtimoiy tarmoqdagi fotosurat
Rossiyalik taniqli mutaxassis Gadji Gadjiyev O‘zbekistonning «G‘azalkent» futbol klubi tuzilmasiga qo‘shildi. U yosh futbolchilar va murabbiy kadrlarni rivojlantirish ishlarini nazorat qiladi. Bu haqda klub vakillari «Farg‘ona» nashriga ma’lum qildi.
Tomonlar kelgusi mavsum uchun hamkorlik qilishga kelishib oldi. Gadjiyev allaqachon ishga kirishgan: u klub tuzilmasi, mashg‘ulotlar jarayoni va futbolchilarni tayyorlash tizimi bilan tanishmoqda. 2027 yilgi mavsumdan boshlab hamkorlik to‘liq shaklda yo‘lga qo‘yilishi kerak.
Mutaxassisning asosiy vazifalaridan biri yosh futbolchilarni tayyorlash tizimini rivojlantirish, shuningdek, murabbiylar bilan ishlash va ularning malakasini oshirishdan iborat bo‘ladi. Gadjiyev bevosita klub tuzilmasida faoliyat yuritadi. Uning O‘zbekiston futbol assotsiatsiyasi bilan hamkorlik doirasida o‘zbekistonlik murabbiylarni tayyorlashga jalb qilinishi mumkinligi haqidagi ma’lumotlar haqiqatga to‘g‘ri kelmaydi.
Gadjiyevning O‘zbekiston futbolida paydo bo‘lishi mumkinligi haqida ilk bor 16 oktyabr kuni ma’lum bo‘lgandi. O‘shanda Championat.asia bosh muharriri Narzulla Saydullayev rossiyalik murabbiy «G‘azalkent»da ish boshlash arafasida ekanini ma’lum qilgan, biroq o‘sha paytda uning lavozimi aytilmagan edi.
«G‘azalkent» — birinchi navbatda yosh futbolchilarni izlab topish va rivojlantirishga yo‘naltirilgan xususiy futbol loyihasi. Bu nomdagi klub 1993 yilda tashkil etilgan va O‘zbekiston Birinchi ligasida ishtirok etgan, ammo keyinchalik o‘z faoliyatini to‘xtatgan. Uni qayta tiklash rejalari 2025 yil dekabr oyida e’lon qilingan.
2026 yilgi mavsum jamoa uchun professional futbolga qaytganidan keyingi birinchi mavsum bo‘ldi. «G‘azalkent» mamlakatning kuchlilik jihatidan ikkinchi divizioni — Pro-ligada ishtirok etmoqda va chempionat tugashiga uch tur qolganida to‘rtinchi o‘rinni egallab turibdi. Jamoa O‘zbekiston Kubogining chorak finaliga ham yetib bordi. Biroq 21 oktyabr kuni Superliganing peshqadamlaridan biri — Namanganning «Navbahor» klubiga 1:3 hisobida mag‘lub bo‘ldi.
Gadji Gadjiyev katta avlodga mansub Rossiyaning eng taniqli murabbiylaridan biri hisoblanadi. U Maxachqal’aning «Anji», Samaraning «Krilya Sovetov», Moskva viloyatining «Saturn», Nijniy Novgorodning «Volga», Permning «Amkar» va Yaponiyaning «Sanfrechche Xirosima» klublarini boshqargan. SSSR olimpiya terma jamoasi murabbiylar shtabi tarkibida 1988 yilda Seulda o‘tkazilgan Olimpiya o‘yinlarining futbol turnirida g‘olib chiqqan.
2021 yildan boshlab Gadjiyev Maxachqal’aning «Dinamo» klubi prezidenti lavozimida ishlab kelgan. 2026 yil yanvar oyida klub prezidentining boshqaruv vazifalarini ham o‘z ichiga olgan lavozimi bekor qilindi. Shundan so‘ng mutaxassis faxriy prezident maqomini oldi.
