Jumgalbek Shabdanbekov. vb.kg sayti fotosurati
Qirg‘iziston Milliy xavfsizlik davlat qo‘mitasi (MXDQ) korruptsiya va uyushgan jinoyatchilikka qarshi tizimli kurashni davom ettiradi, faqat qonuniy yo‘llar bilan. Jumladan, qo‘mita «niqobli shoular» amaliyotidan voz kechadi. Bu haqda maxsus xizmatning yangi rahbari Jumgalbek Shabdanbekov «Vecherniy Bishkek» gazetasiga bergan intervyusida ta'kidladi.
General MXDQ ichidagi kadrlar «tozalash»ga urg‘u berdi. Uning so‘zlariga ko‘ra, qonunbuzarliklarga yo‘l qo‘yganlar allaqachon lavozimlaridan bo‘shatilgan, ularning harakatlari qonuniy baholanadi va rasmiylar bu haqda jamoatchilikni xabardor qiladi.
«Bundan buyon davlat idoralarida daxlsizlar bo‘lmaydi. Noqonuniy harakatlarda aybdor deb topilgan har bir kishi javobgarlikka tortiladi», — dedi Shabdanbekov.
U islohotlar tizimli xarakterga ega bo‘lib, o‘zgaruvchan xalqaro vaziyatni hisobga olgan holda xavfsizlikni samarali ta'minlash va respublikaning konstitutsiyaviy tuzumini himoya qilishga qodir moslashuvchan, professional va shaffof tuzilmani yaratishga qaratilganligiga aniqlik kiritdi. Maxsus xizmat islohotlarida asosiy e'tibor operativ va tahliliy ishlarning klassik va an'anaviy usullariga qaratiladi.
Ofitser ta'kidlashicha, Milliy xavfsizlik qo‘mitasi partiyalar, mafkuralar yoki biron bir alohida manfaatlar ta'siriga bog‘liq siyosiy vosita bo‘lmasligi kerak.
«Milliy xavfsizlik davlat qo‘mitasini isloh qilish tashkilotni huquqiy asosga o‘tkazilishini — eskirgan, qattiq harbiy usullardan huquqiy, fuqarolik boshqaruv usullariga o‘tishini nazarda tutadi <…> Qo‘rqitish mafkurasidan voz kechish va hozirgi voqelikni aks ettiruvchi zamonaviy milliy xizmatni yaratish vaqti keldi», — deb xulosa qildi general.
Intervyuda shuningdek, 2024 yilda Qirg‘izistonda kirish cheklangan TikTok ijtimoiy tarmog‘ini bloklashni qayta ko‘rib chiqish masalasiga ham e'tibor qaratildi. Ba'zi siyosatchilar va parlament a'zolari ushbu platforma Markaziy Osiyo respublikasining biznes va turizm salohiyatini targ‘ib qilish uchun platformaga aylanishi mumkin, deb hisoblashadi.
MXDQ rahbari TikTok ijtimoiy tarmog‘ida qirg‘iz mentalitetiga mos kelmaydigan ma'lumotlar tarqalayotgani haqidagi ko‘plab fuqarolarning shikoyatlaridan so‘ng bloklanganini eslatdi. Shabdanbekov bu yerda giyohvand moddalar, alkogol va qimor o‘yinlari ochiqchasiga reklama qilinayotgani, shafqatsizlik va zo‘ravonlik oqlanayotgani, oilaviy va an'anaviy qadriyatlar rad etilayotganini qo‘shimcha qildi, bu esa o‘smirlarga ayniqsa salbiy ta'sir ko‘rsatadi.
«Farzandlarimiz kelajagi har qanday ijtimoiy tarmoqlardan muhimroq. Hech bir raqamli platforma yosh avlodning sog‘lig‘i, ta'limi va axloqiy rivojlanishidan muhimroq bo‘lishi mumkin emas», — dedi xavfsizlik xizmati rahbari TikTokni blokdan chiqarishdan bosh tortilayotganini tushuntirdi.
U shuningdek, qo‘mita internetni doimiy ravishda tahlil qilib, kuzatib borishini, buzg‘unchi va noqonuniy kontentlar tarqalishini oldini olishini tushuntirdi.
