Marlen Mamataliyev. Qirg‘iziston parlamenti matbuot xizmati fotosurati
Yashirin ovoz berish natijasida deputat Marlen Mamataliyev Qirg‘iziston Jogorku Kenesh (parlament)ining yangi To‘rag‘asi (raisi) etib saylandi. Uning nomzodini 77 nafar hamkasbi qo‘llab-quvvatladi, deb xabar beradi parlament matbuot xizmati.
Mamataliyevni rais lavozimiga «Ata-Jurt», «Ala-Too», «Eldik», «Mekenchil», «Adilet Kirgizstan» fraktsiyalarining bir nechta deputatlar guruhi nomzod qilib ko‘rsatgan.
Ushbu masala 12 fevral kuni Butun Jogorku Kenesh (JK) qo‘mitasining Konstitutsiyaviy qonunchilik, davlat tuzilishi, mahalliy o‘zini o‘zi boshqarish va reglament qo‘mitasi rahbari Qurmanqul Zulushev raisligida bo‘lib o‘tgan yig‘ilishida muhokama qilingan.
Keyin ovoz berish bo‘lib o‘tgan va deputatlarning ko‘pchiligi Mamataliyevni rais etib saylash uchun ovoz bergan. Parlamentning atigi besh a'zosi taklifga qarshi ovoz bergan.
Jogorku Kenesh o‘z hamkasbini parlament raisi etib tasdiqlovchi tegishli qarorni qabul qilgan.
Jogorku Kenesh raisining o‘rni 12 fevral kuni ertalab Nurlanbek Turg‘unbek o‘g‘li o‘z ixtiyori bilan iste'foga chiqishini e'lon qilganidan so‘ng bo‘sh qolgandi. U parlament a'zosi bo‘lib qolishini aytib, hamkasblarini siyosiy barqarorlikni saqlash uchun fitnalarsiz ishlashni o‘rganishga chaqirgandi.
Shuni ta'kidlash lozim, Turg‘unbek uuluning raislik lavozimidan iste'fosi Bosh vazir o‘rinbosari va Respublika Milliy xavfsizlik davlat qo‘mitasi rahbari Kamchibek Tashiyev ishdan bo‘shatilganidan so‘ng sodir bo‘ldi.
ℹ️ Marlen Mamataliyev 1981 yil 24 martda Bishkekda tug‘ilgan. U bir qancha oliy ma'lumotga ega. Xususan, u Qirg‘iziston texnika universitetini (axborot texnologiyalari fakulьteti), Qirg‘iziston iqtisodiyot universitetini (moliya va kredit mutaxassisligi bo‘yicha), Qirg‘iziston milliy universitetini (huquqshunoslik) va Singapur Civil Service Collegeni («Davlat xizmatida inson resurslarini boshqarish» mutaxassisligi bo‘yicha) tamomlagan. Shuningdek, u Rossiya Prezidenti huzuridagi Xalq xo‘jaligi va davlat boshqaruvi akademiyasida tahsil olgan va u yerda davlat boshqaruvi mutaxassisligi bo‘yicha diplom olgan.
Deputatning rezyumesida Ijtimoiy jamg‘arma, Iqtisodiyot va moliya vazirligi hamda Respublika Bosh vazirining birinchi o‘rinbosarining maslahatchisi lavozimlari ko‘rsatilgan.
2010 yildan 2011 yilgacha Mamataliyev «Ar-Namis» parlament fraktsiyasi kotibiyatini boshqargan, keyin Iqtisodiy tartibot vazirligida yuqori lavozimlarda ishlagan. 2012 yilda u hukumat apparatining real sektor bo‘limini boshqargan. 2013 yildan boshlab u besh yil davomida biznes sohasida ishlagan, jumladan, «Aziya moll» savdo-ko‘ngilochar markazining bosh direktori lavozimida ishlagan. 2021 yildan beri u Jogorku Keneshning yettinchi chaqiriq deputati, «Intimak» fraktsiyasining rahbari va Byudjet, iqtisodiy va fiskal siyosat qo‘mitasi rahbari. Darvoqe, o‘sha paytda u tashabbus ko‘rsatilgan va qabul qilingan qonunlar bo‘yicha saylangan xalq noiblari reytingida birinchi o‘rinni egallagan.
2025 yilda u Bishkekning Pervomayskiy tumanidagi bir mandatli saylov okrugidan sakkizinchi chaqiriq parlament deputati etib qayta saylangan.
