«Bunyodkor» stadioni. Kun.uz fotosurati
O‘zbekiston Professional futbol ligasi (PFL) Toshkentdagi «Bunyodkor» stadionining elektr energiyasidan qarzini to‘lashga muxlislarga yordam berishni taklif qildi. Liga o‘z chaqiriqini ijtimoiy tarmoqlarda e’lon qilib, kommunal xizmat ko‘rsatuvchi DOMO tomonidan tashkil etilgan mablag‘ yig‘imi haqida ma’lumot tarqatdi.
DOMO ma’lumotlariga ko‘ra, stadionning qarzi 1,728 milliard so‘mni (taxminan 147 ming dollar) tashkil etadi. Xizmat ilovasining «Xayriya» bo‘limida qarzni to‘lash uchun mablag‘ o‘tkazish imkoniyati ochilgan. DOMO ta’kidlashicha, yig‘ilgan mablag‘lar to‘g‘ridan to‘g‘ri elektr energiyasi uchun qarzni qoplashga yo‘naltiriladi.
Elektr energiyasi ta’minoti qarzdorlik sababli 4 sentyabr kuni to‘liq to‘xtatilgan. 7 sentyabr kuni PFL elektr energiyasi uzilgani munosabati bilan uning xodimlari vaqtincha masofaviy ishlashga o‘tganini ma’lum qildi.
Liganing matchlarni televizion va internet orqali translyatsiya qilish signallarini markazlashtirilgan holda uzatish uchun foydalaniladigan serverlari ham elektr energiyasiz qolgan. PFL tashqi serverlarga o‘tishga majbur bo‘lgan. Liga bu translyatsiyalar sifatiga ta’sir qilishi mumkinligidan ogohlantirdi.
Stadionni moliyalashtirish bilan bog‘liq muammolar 2026 yil boshidan beri davom etmoqda. Ilgari «Bunyodkor» infratuzilmasi xarajatlarini davlat kompaniyasi «O‘zbekneftgaz» qoplab kelgan, biroq 1 yanvardan boshlab kompaniya asosiy faoliyatiga taalluqli bo‘lmagan xarajatlardan voz kechish doirasida futbol klublarini moliyalashtirishni to‘xtatdi.
Shu bilan birga, futbol klubi va stadion direksiyasi turli yuridik shaxslar hisoblanadi. Kun.uz ma’lumotlariga ko‘ra, «Bunyodkor» stadioni binolari va inshootlaridan foydalanish direksiyasi» MCHJning 100 foiz ulushi O‘zbekiston futbol assotsiatsiyasiga tegishli. «O‘zbekneftgaz» tomonidan moliyalashtirish to‘xtatilganidan so‘ng direksiyani saqlash manbasi noaniqligicha qolgan.
Bahorda stadion elektr energiyasidan yana uzilgan edi. O‘shanda qarzdorlik 1,176 milliard so‘mni (taxminan 100 ming dollar) tashkil etgani xabar qilingandi. Qarzning bir qismi to‘langan va kafolat xati taqdim etilganidan so‘ng elektr ta’minoti tiklangan.
Direksiyada ish haqi bo‘yicha ham qarzdorlik yuzaga kelgan. May oyida Davlat mehnat inspeksiyasi bir necha oy davomida to‘planib qolgan 867 million so‘m (taxminan 73,5 ming dollar) mablag‘ 49 nafar xodimga to‘langanini ma’lum qilgan.
«Bunyodkor» futbol klubining o‘zi ham moliyaviy qiyinchiliklarni boshdan kechirmoqda. 2008–2010 yillarda jamoa safida jahon chempioni va «Oltin to‘p» sohibi Rivaldo to‘p tepgan. Joriy yilda FIFA Toshkent klubiga braziliyalik futbolchi oldidagi moliyaviy majburiyatlar bajarilmagani sababli yangi futbolchilarni ro‘yxatdan o‘tkazishni taqiqladi. Xabarlarga ko‘ra, 9,2 million yevrolik umumiy qarz miqdori klubning ikki-uch yillik budjetiga teng. Futbolchi bilan 2028 yilga qadar hisob-kitob qilish rejalashtirilgan edi. 2026 yil uchun navbatdagi to‘lov 15 aprelga qadar futbolchining hisob raqamiga tushishi kerak edi, biroq bu amalga oshmagan. To‘lov muddati kechikkani sababli qarz miqdori penya hisoblanishi hisobiga oshadi.
Futbolchilar o‘tgan yildan beri maosh olmayapti. Stadiondagi qarzdorlik sababli nafaqat elektr energiyasi, balki suv ta’minoti ham uzib qo‘yilgan.
