«Qayrat» FK. «Qayrat» FK fotosi
Olmaotaning «Qayrat» futbol klubi UEFA Konferensiyalar ligasi umumiy bosqichining uchinchi turida Italiyaning «Atalanta» jamoasi bilan safarda kutilmagan durang qayd etdi. 5 noyabr kuni Bergamoda boʻlib oʻtgan uchrashuv 1:1 hisobida yakunlandi. Qozogʻiston klubi ikkinchi boʻlimda hisobda oldinga chiqib olib, gʻalabaga juda yaqin kelgan edi, ammo mezbonlar muvozanatni tiklashga muvaffaq boʻlishdi.
Raqibning maqomiga qaramay, «Qayrat» faqat himoyalanish bilan cheklanib qolmadi. Bahs boshidayoq olmaotaliklar ikkita burchak toʻpi ishlab olishdi, biroq sekin-asta tashabbus mezbonlar tomoniga oʻtdi. Olmaotaliklar darvozaboni Temirlan Anarbekov jamoasini bir necha bor muqarrar goldan qutqarib qoldi. 31-daqiqada «Atalanta»ning xorvatiyalik yarim himoyachisi Mario Pashalich qulay vaziyatdan noaniq zarba berib, hisobni ochish uchun ajoyib imkoniyatni qoʻldan boy berdi.
Tanaffusdan keyin «Qayrat» qarshi hujumlarning biridan unumli foydalandi. 53-daqiqada Edmilson Mark Gualni Marko Karnesekki bilan birga-bir vaziyatga chiqardi va ispaniyalik hujumchi italyan klubi posbonini ojiz qoldirdi.
Oʻtkazib yuborilgan toʻp «Atalanta»ni hujumkorlikni oshirishga majbur qildi. Mezbonlar bosh murabbiyi Mauritsio Sarri zaxiradan Sharl de Ketelare, Nikola Zalevski va Nikola Krstovichlarni maydonga tushirib, hujum chizigʻini kuchaytirdi. Anarbekov yana bir necha bor «Qayrat»ni qutqardi, ammo 82-daqiqada italiyaliklar oʻz maqsadiga erishdi. Burchak toʻpi oshirib berilganidan soʻng Relya Obrich toʻpni Krstovichga yetkazdi va u yaqin masofadan toʻpni darvoza toʻriga yoʻlladi. Qolgan vaqt ichida hisob oʻzgarmadi.
«Qayrat» bosh murabbiyi vazifasini bajaruvchi Jora Arutyunyan oʻyindan soʻng futbolchilarga minnatdorchilik bildirdi va amalda ushbu durangni gʻalabaga tenglashtirdi.
«His-tuygʻular joʻsh urmoqda. Umuman olganda, barcha futbolchilarga rahmat aytmoqchiman, bu birinchi navbatda ularning gʻalabasi», — dedi Arutyunyan.
Mutaxassis gʻalaba qozonish uchun ayrim vaziyatlarda shogirdlariga aniqroq qarorlar yetishmaganini tan oldi, biroq uchrashuv boshlanishidan avval jamoa durangdan ham mamnun boʻlishini taʼkidladi. Uning soʻzlariga koʻra, uch himoyachili taktik sxemaga oʻtilishi Italiya klubi oʻyinini chuqur oʻrganish natijasi boʻlgan.
Mauritsio Sarri esa oʻz navbatida «Atalanta»dagi tarkib muammolaridan nolidi. Italiyalik mutaxassisning soʻzlariga koʻra, jamoaning oʻn nafar futbolchisi jarohat olgan, yana toʻrt nafariga esa tibbiy shtab oʻyin vaqtini cheklashni tavsiya qilgan.
«Agar bemaʼni golni oʻtkazib yubormaganimizda, gʻalaba qozonishimiz mumkin edi. Ammo biz taslim boʻlmadik», — dedi Sarri.
«Qayrat» uchun Bergamodagi durang joriy yevrokubok mavsumidagi eng eʼtiborga molik natijalardan biri boʻldi. Birinchi turda olmaotaliklar Latviyaning «Riga» klubi bilan ochko boʻlishib olgandi (1:1), biroq oʻz maydonida Gretsiyaning «Panatinaikos» jamoasiga yirik hisobda imkoniyatni boy bergandi (1:5).
Uch turdan soʻng Qozogʻiston klubi ikki ochko bilan 36 ishtirokchi orasida 27-oʻrinni egallab turibdi va hozircha pley-off hududidan tashqarida qolmoqda. Musobaqadagi kurashni davom ettirish uchun eng yaxshi 24 jamoa qatoriga kirish talab etiladi. «Atalanta» esa toʻrt ochko jamgʻarib, 16-pogʻonada bormoqda.
«Qayrat» navbatdagi uchrashuvni 26 noyabr kuni Olmaotada uch turdan soʻng yetti ochko toʻplagan Shvetsiyaning «Myelbyu» klubiga qarshi oʻtkazadi. Shundan soʻng olmaotaliklarni Ruminiyaning Krayova shahri «Universitatya» jamoasi va Niderlandiyaning «Tvente» klubiga qarshi bahslar kutmoqda.
