Osiyo Futbol Konfederatsiyasi (OFK) 2031 va 2035 yilgi Osiyo Kuboklarini o‘tkazish uchun nomzodlarning yakuniy ro‘yxatini e'lon qildi. Unga Qirg‘iziston, Tojikiston va O‘zbekistonning qo‘shma arizasi ham kiritilgan. Bu haqda OFK rasmiy saytida xabar berildi.
OFK prezidenti Shayx Salmon bin Xalifaning taklifiga binoan, 2031 va 2035 yilgi Osiyo Kuboklarini o‘tkazish variantlari maxsus kongressda ko‘rib chiqiladi, uning sanasi hali e'lon qilinmagan.
Avstraliya, Hindiston, Indoneziya, Janubiy Koreya va Quvayt 2031 yilgi Osiyo Kubogini o‘tkazish uchun kurashmoqda. Markaziy Osiyoning uchta mamlakati — Qirg‘iziston, Tojikiston va O‘zbekiston qo‘shma ariza topshirishdi. BAA o‘z arizasini qaytarib oldi.
Avstraliya, Yaponiya, Janubiy Koreya va Quvayt 2035 yilgi Osiyo Kubogini o‘tkazish uchun ariza topshirishdi. Markaziy Osiyo mamlakatlari bundan o‘zini tiydi.
«Farg‘ona» mutaxassislardan Markaziy Osiyo respublikalarining Osiyo Kubogini potentsial ravishda o‘tkazishga tayyorligi haqida fikr bildirishlarini so‘radi.
Taniqli qirg‘iz jurnalisti va «Dordoy» futbol klubi matbuot xodimi Tengerbes Musayev bunday katta turnirni o‘tkazishda yuqori darajada mas'uliyat yuklanishini ta'kidlaydi.
«Hozirda Qirg‘izistonning keyingi Osiyo Kubogini o‘tkazish imkoniyati yoki tayyorligi haqida gapirganda, men aniq javob berishga qiynalaman, chunki Osiyo Kubogi nima ekanini tushunaman. Men so‘nggi ikkita qit'a chempionatida ommaviy axborot vositalari xodimi bo‘lib ishlaganman. Turnirning mas'uliyati va darajasi juda yuqori. Qirg‘iziston turli xil turnirlarni o‘tkazishda katta tajribaga ega, ammo faqat saralash bosqichida. Biz hali OFK turnirlarining final bosqichlarini o‘tkazmadik, bu asosan ob'ektiv sabablarga bog‘liq: infratuzilma va inson resurslarining yetishmasligi. Bu bi tomondan.
Boshqa tomondan, mamlakatimizda futbol rivojlanish sur'ati chindan ham insonni zavqlantiradi. Faqat so‘nggi bir necha yil ichida avvalgi davrlarga qaraganda ko‘proq narsaga erishildi. Bu, albatta, birinchi navbatda, mamlakat yuqori lavozimli amaldorlarining shaxsiy qiziqishiga bog‘liq.
Hammasi kelajakdagi qadamlar va rivojlanish sur'atlariga bog‘liq: masalan, 2026 yilda belgilangan talablarga maksimal darajada rioya qilinishini ta'minlash uchun qancha ish qilinadi. Bu mezbon stadionlarning o‘ziga, shuningdek, mehmonxonalar, mashg‘ulot maydonlari, aeroportlar va boshqalarga qo‘yiladigan talablarga tegishli, lekin... Uch mamlakat o‘rtasidagi logistika haqida gapirib o‘tamiz. Shuningdek, qo‘shnilarimiz xalqaro musobaqalarni o‘tkazishda katta tajribaga ega ekani bizga foyda keltiradi. Masalan, O‘zbekiston ikki yil oldin FIFA futzal bo‘yicha jahon chempionatiga mezbonlik qilgan va kelasi yili Ozarbayjon bilan birgalikda 20 yoshlilar Jahon chempionatiga mezbonlik qiladi. Shuning uchun biz nafaqat mezbonlik qilish huquqiga umid qilishimiz, balki o‘zimiz ham barcha sa'y-harakatlarni amalga oshirishimiz kerak», — deydi Musayev.
Tojikiston Futbol Federatsiyasi matbuot xizmati rahbari Faridun Saliyev Markaziy Osiyo mamlakatlari bu vazifani uddalay olishiga ishonadi, ammo OFKga iroda kerak.
«Osiyo Kubogi hech qachon Markaziy Osiyoda o‘tkazilmagan va uni o‘tkazish katta turtki bo‘ladi. Futbol infratuzilmasiga ega bo‘lmagan mamlakatlar bunga erishadilar va bu ularga kelgusi yillarda uzoq xizmat qiladi (masalan, Rossiyada 2018 yilgi Jahon chempionati uchun qurilgan stadionlar). Salbiy tomoni shundaki, hozirda Osiyo Kubogi o‘yinlarini o‘tkazish uchun tayyor infratuzilmaning yo‘qligi. Muayyan logistika muammolari va viza tartiblari mavjud, ammo bularning barchasini hal qilish mumkin. Agar OFK Markaziy Osiyo mamlakatlarida futbol infratuzilmasini yaxshilashga tayyor bo‘lsa, 2031 yilgi Osiyo Kubogi bizning mintaqamizda o‘tkaziladi», — dedi Saliyev.
O‘zbekistonlik mashhur bloger va «Surxon» futbol klubi matbuot kotibi Yevdokim Raimov O‘zbekistonning Osiyo Kubogini o‘tkazishga tayyorligiga ishonadi.
«O‘zbekiston eng yuqori darajada turnirlarni o‘tkazishga to‘liq tayyor. Bizda 20 yoshgacha bo‘lganlar o‘rtasidagi Osiyo kubogi va FIFA futzal bo‘yicha Jahon chempionatini o‘tkazish tajribasi bor. Shunday qilib, infratuzilma nuqtai nazaridan deyarli kerakli tajriba bor. Mamlakatda futbol rivojlanmoqda. Muxlislar milliy chempionat o‘yinlariga tashrif buyurishdan va milliy terma jamoani qo‘llab-quvvatlashdan zavqlanishadi. Afsuski, Qirg‘iziston va Tojikistondagi vaziyatni baholash men uchun qiyin. Biroq, ariza topshirilgani ularning niyatlari jiddiy ekanini tasdiqlaydi deb o‘ylayman. Markaziy Osiyo mamlakatlari hech qachon Osiyo kubogini o‘tkazmagan, shuning uchun menimcha, bu mintaqada futbolni rivojlantirish uchun adolatli va foydali turtki bo‘ladi», — dedi Raimov.
