Olmaota hokimligi matbuot xizmati fotosurati
Olmaotada yanvar voqealari paytida yonib ketgan prezident qarorgohi o‘rnida, ya’ni Nazarboyev shoh ko‘chasining g‘arbi va Gandi ko‘chasining shimolida rasman hiyobon ochildi, deb xabar beradi InformBYURO shahar hokimligiga tayangan holda.
Hiyobon noyabr oyining boshida tashrif buyuruvchilar uchun ochilgan, ammo endigina rasman ochildi. Uning umumiy maydoni 4,16 gektarni tashkil etadi, ulardan deyarli uch gektari yashil maydondan iborat. Obodonlashtirish loyihasi davomida 10 000 kvadrat metrdan ortiq piyodalar yo‘laklari yotqizilgan, 77 ta skameyka va 52 ta axlat qutisi o‘rnatilgan, zamonaviy yoritish va avtomatik sug‘orish tizimlari o‘rnatilgan.
Yangi hiyobonning o‘ziga xos xususiyati — qishda muz maydonchasiga aylantiriladigan sun’iy hovuzga egaligida. Shuningdek, yonib ketgan qarorgoh devorining kichik bir qismini saqlab qolishga qaror qilingan — uni oynali panjara ortida ko‘rish mumkin.
QR prezidenti qarorgohi yanvar tartibsizliklaridan so‘ng. Ijtimoiy tarmoq fotosurati
2022 yil yanvar oyidagi tartibsizliklar paytida prezident qarorgohi, Olmaota hokimiyati binosi bilan birga, yong‘in natijasida jiddiy zarar ko‘rgan. Prezident Qosim-Jomart To‘qayev keyinchalik bino qayta tiklanmasligi va uning o‘rnida park tashkil etilishiga qaror qildi. Prezident yaqin atrofdagi binoni o‘z qarorgohi sifatida ishlatadi, bu bino o‘tgan yili Nursulton Nazarboyev jamg‘armasi tomonidan Prezident mulkini boshqarish departamentiga o‘tkazilgan.
2023 yil fevral oyida Olmaotaning o‘sha paytdagi hokimi Yerbolat Dosayev sobiq prezident qarorgohi o‘rnida 2024 yili hiyobon paydo bo‘lishini va’da qilgandi.
