gazeta.uz sayti fotosurati
O‘zbekiston prezidenti Shavkat Mirziyoyev har yili bir million nafar yoshni robototexnika, kompyuter o‘yinlarini yaratish, startaplar va IT sohasining boshqa istiqbolli yo‘nalishlari bo‘yicha o‘qitish vazifasini qo‘ydi. Mamlakatda trenerlar korpusi shakllantiriladi, qisqa muddatli kurslarni ishga tushirish tezlashtiriladi va ilmiy tadqiqotlar olib boriladi. Bu chora-tadbirlar respublikada raqamli ta’lim ekotizimini rivojlantirishga bag‘ishlangan yig‘ilishda muhokama qilindi, deb xabar beradi davlat rahbarining matbuot xizmati.
Axborot texnologiyalari sohasida 2030 yilgacha 300 mingta ish o‘rni yaratish bo‘yicha belgilangan maqsadga joriy yilning o‘zida erishildi. Endi raqamli iqtisodiyotning yangi yo‘nalishlarini rivojlantirish hisobiga 2030 yilga qadar yana 500 mingta ish o‘rni yaratish vazifasi qo‘yildi.
Buning uchun yoshlarni o‘qitishdan boshlab, kasbiy ko‘nikmalarini tasdiqlash va ishga joylashtirishgacha bo‘lgan jarayonlarni qamrab oluvchi yagona raqamli ta’lim ekotizimini shakllantirish zarur. Yig‘ilishda 2030 yilgacha an’anaviy va masofaviy ta’lim shakllari orqali taxminan 5,5 million nafar o‘zbekistonlikni o‘qitish mumkinligi qayd etildi. Maktab o‘quvchilari uchun «Al-Xorazmiy vorislari» va «Sun’iy intellektning besh million yetakchisi» loyihalari kengaytiriladi, talabalar uchun esa oliy ta’lim muassasalari va xususiy o‘quv markazlarining imkoniyatlari birlashtiriladi.
Mutaxassislar tayyorlash tizimini mehnat bozori talablariga moslashtirish masalalariga ham alohida e’tibor qaratildi. Sun’iy intellekt, mikrosxemalarni loyihalash, dron texnologiyalari va kompyuter o‘yinlarini ishlab chiqish kabi yo‘nalishlarda ta’limni rivojlantirish, talabalarning amaliy loyihalarda ishtirokini kengaytirish taklif etildi.
Shuningdek, maktablarda informatika o‘qituvchilarining sun’iy intellekt sohasidagi malakasini oshirish, ularga tegishli sertifikatlar berish va talabalarning xalqaro kurslarda qatnashish imkoniyatlarini kengaytirish masalalari ko‘tarildi. Prezident Farg‘ona tajribasi asosida iOS dasturchilarini tayyorlash markazlarini tashkil etish, xususiy ta’lim markazlariga mentorlar tayyorlash takliflari ma’qullandi.
Ilmiy tadqiqotlarni o‘quv jarayoniga integratsiya qilish maqsadida oliy ta’lim muassasalarida o‘rnatilgan tizimlar, mikroelektronika va buyumlar interneti sohalari bo‘yicha mutaxassislar tayyorlashni boshlash, shuningdek, muhandislik loyihalari va tadqiqot laboratoriyalarini qo‘llab-quvvatlash taklif qilindi.
Bitiruvchilar o‘z bilimlarini amalda qo‘llay olishlari uchun ta’lim, kasbiy ko‘nikmalar, tillarni bilish darajasi va sertifikatlar haqidagi ma’lumotlarni birlashtiradigan «Raqamli yoshlar» platformasini rivojlantirish rejalashtirilmoqda. Ushbu platforma ish o‘rinlarini tanlash va mehnat bozorida to‘g‘ri yo‘nalish olishga yordam beradi.
Jarayonga global texnologik kompaniyalarni jalb qilish zarurati ham muhokama qilindi. O‘tgan yili ushbu yo‘nalishda 22 million dollar grant jalb qilingan. Tizimli hamkorlik orqali mazkur ko‘rsatkichni shu yil yakunigacha 60 million dollarga, 2030 yilga borib esa yiliga 100 million dollarga yetkazish topshirildi.
Joriy yilda jalb etiladigan grant mablag‘larining yarmini raqamli ta’limga, qolgan yarmini malaka oshirish dasturlari hamda chekka hududlarda raqamli ta’lim markazlarini tashkil etish, ularni sun’iy intellekt, robototexnika va dasturlashni o‘qitish uchun zamonaviy uskunalar bilan jihozlashga yo‘naltirilishi belgilandi.
Mirziyoyev raqamli ta’limda qamrov bilan birga o‘qitish sifati va uning bandlikka ta’siri ham asosiy mezon bo‘lishi kerakligini ta’kidladi.
Qayd etish joiz, oktyabr oyi boshida O‘zbekiston terma jamoasi Janubiy Koreyada bo‘lib o‘tgan nufuzli First Global Challenge 2026 xalqaro musobaqasida g‘olib chiqib, robototexnika bo‘yicha jahon chempionligi unvonini qo‘lga kiritdi. O‘zbekiston jamoasi 180 dan ortiq mamlakat vakillaridan o‘zib ketdi. Prezident terma jamoa murabbiyi va a’zolarini davlat mukofotlari bilan taqdirlash to‘g‘risida farmon imzoladi.
