Marko Rubio samolyot zinapoyasidan tushmoqda. UzA fotosurati
18 oktyabr kuni kechqurun AQSH Davlat kotibi Marko Rubio Samarqandga yetib keldi, deb xabar beradi UzA. Uni aeroportda O‘zbekiston prezidenti Administratsiyasi rahbari Saida Mirziyoyeva va boshqa rasmiy shaxslar kutib oldi. Rubio «Markaziy Osiyo — AQSH» (C5+1) formatidagi Tashqi ishlar vazirlari uchrashuvida ishtirok etish uchun keldi.
AQSH Davlat kotibi mamlakatga rafiqasi bilan birga uchib keldi. Bu uning Markaziy Osiyoga ilk tashrifidir. Samarqandga prezident Shavkat Mirziyoyev ham keldi. U Rubio bilan muzokaralar o‘tkazadi va Ishbilarmonlik kengashi yig‘ilishida ishtirok etadi.
Dushanba kuni Samarqandda Amerika — O‘zbekiston ishbilarmonlik va investitsiyalar kengashining ikkinchi yig‘ilishi bo‘lib o‘tadi. Uning hamraislari — Saida Mirziyoyeva va Serdjio Gor. UzA ma’lumotlariga ko‘ra, tadbirda ishtirok etish uchun 200 dan ortiq amerikalik tadbirkor kelgan. Nashr buni AQSH biznesining O‘zbekistonga qiziqishi ortib borayotganidan dalolat deb hisoblaydi. Shu kuni C5+1 uchrashuvi ham bo‘lib o‘tadi. Bundan tashqari, Rubio va O‘zbekiston Tashqi ishlar vaziri Baxtiyor Saidov ikki mamlakat o‘rtasidagi kengaytirilgan strategik sheriklik bo‘yicha muloqotning birinchi raundini o‘tkazadi.
Tashrif haqida oldindan ma’lum qilingan edi. «Farg‘ona» nashri AQSH Davlat departamentiga tayanib xabar berganidek, safar 17 oktyabrdan 22 oktyabrgacha davom etadi. Umumiy uchrashuvdan tashqari, Rubio mintaqaning barcha besh davlati — O‘zbekiston, Qozog‘iston, Tojikiston, Turkmaniston va Qirg‘izistonning yuqori martabali vakillari bilan ikki tomonlama muzokaralar o‘tkazishni rejalashtirgan. Samarqanddan keyin Davlat kotibi Hindistonga yo‘l oladi. U yerda Mumbay va Jamnagar shaharlarida uchrashuvlar o‘tkazishi rejalashtirilgan.
C5+1 formati 2015 yildan buyon faoliyat yuritib keladi. Ilk vazirlar uchrashuvi aynan Samarqandda bo‘lib o‘tgandi. Yaqinda mazkur format eng yuqori darajaga ko‘tarildi. 2025 yil 6 noyabrda Vashingtonda Donald Tramp va mintaqaning besh davlati rahbarlari ishtirokida C5+1 formatidagi ikkinchi sammit bo‘lib o‘tgandi.
UzA nashrining baholashicha, jahon ommaviy axborot vositalari ushbu tashrifni Vashingtonning mintaqa davlatlari bilan iqtisodiy aloqalarni kengaytirish va strategik sheriklikni mustahkamlashga intilishi bilan bog‘lamoqda.
