Eron bir necha hafta ichida Xitoyda ishlab chiqarilgan birinchi partiyadagi ko‘chma havo mudofaasi vositalarini qabul qilishi mumkin. Gap eng ko‘pi bilan 400 ta majmua yetkazib berish bo‘yicha shartnoma haqida ketmoqda, ammo Tehron ham, Pekin ham ushbu kelishuv tuzilganini tasdiqlamagan. Bu haqda Reuters agentligi uch nafar xabardor manbaga tayangan holda ma’lum qildi.
Reuters ma’lumotlariga ko‘ra, kelishuv 300–400 ta ko‘chma zenit-raketa majmualari, jumladan QW-12 va FN-16 raketalarini qamrab oladi. Shartnoma qiymati taxminan 60–70 million dollarni tashkil etadi. Bunday qurollar nishonni infraqizil nurlanish orqali aniqlaydi va asosan vertolyotlar, dronlar hamda past balandlikda harakatlanuvchi samolyotlarga qarshi qo‘llash uchun mo‘ljallangan.
Reuters manbalari ta’kidlashicha, buyurtmani rasmiylashtirishda vositachi sifatida Gonkongda ro‘yxatdan o‘tgan Zhongqing Baoshang International Investment kompaniyasi ishtirok etgan. Taxmin qilinayotgan logistika sxemasiga ko‘ra, yuk Xitoyning Urumchi shahri aeroportlaridan samolyotlar orqali jo‘natilishi, keyin esa Pokiston hududi orqali olib o‘tilishi kerak bo‘lgan. Manbalar ushbu bosqichda yetkazib berish havo yoki quruqlik orqali amalga oshirilishi rejalashtirilgani haqida aniq ma’lumot bermagan.
Xitoy Tashqi ishlar vazirligi ushbu xabarni asossiz deb atadi va Pekin aksincha, mojaroni to‘xtatishga ko‘maklashayotganini bildirdi. Pokiston qurolli kuchlari matbuot xizmati ham mamlakat Eronga Xitoy havo mudofaasi tizimlarini yetkazib berishga aloqador ekani haqidagi ma’lumotlarni rad etdi. Eron Tashqi ishlar vazirligi va Gonkongdagi vositachi kompaniyaning bosh tuzilmasi agentlik so‘roviga tezkor javob bermagan.
Yevropalik manba agentlikka ma’lum qilishicha, QW oilasiga kiruvchi majmualar bo‘yicha bir nechta ehtimoliy kelishuvlar mavjud va ular doirasida QW-18, QW-19 hamda QW-12 modellari tilga olingan. Yaqin Sharq mintaqasidan bo‘lgan yana bir manba Tehronning QW-18 va QW-12 tizimlariga qiziqishi haqida ma’lumotga ega bo‘lgan, ammo shartnoma imzolangani haqida ma’lumotga ega emasligini bildirgan. Ushbu izohlar va Pekinning rasmiy raddiyasi hozircha mazkur yetkazib berish haqidagi ma’lumotni mustaqil ravishda tasdiqlangan deb hisoblash imkonini bermaydi.
