Yevgeniy Korobov. vot-tak.tv sayti fotosurati
5 fevral kuni Ostona sudi rossiyalik harbiy xizmatchi Yevgeniy Korobovga qochqin maqomini berishdan bosh tortdi. Uning himoyachisi, Qozog‘iston Inson huquqlari byurosi advokati Artur Alxastov «Vot Tak» loyihasiga (u Rossiya Adliya vazirligining xorijiy agentlar reyestriga kiritilgan) bergan intervьyusida shunday dedi.
Alxastov so‘zlariga ko‘ra, Qozog‘iston Rossiyaning Ukrainadagi maxsus harbiy operatsiyasi boshlanganidan beri yana o‘nta rossiyalik dezertirga nisbatan shunga o‘xshash qarorlar chiqargan, Korobov bu ro‘yxatda — o‘n birinchisi.
Katta leytenant Yevgeniy Korobov harbiy akademiyani bitirgan va professional ofitser. U maxsus harbiy operatsiyaning boshidanoq jang qilgan, ammo uning so‘zlariga ko‘ra, hech qachon hech kimga qarshi to‘g‘ridan-to‘g‘ri o‘q uzmagan va bitta topshiriq paytida frontdan qochish uchun o‘zini oyog‘iga o‘zi otgan. 2022 yil oxirida, kasalxonaga yotqizilgandan so‘ng, u Qozog‘istonga qochib o‘tadi va bu yerda vaqtinchalik yashash uchun ruxsatnoma oladi. 2024 yil aprelidan beri u boshpana izlovchi maqomida. Bu vaqt ichida unga qarshi Rossiyada RF Jinoyat kodeksining 338-moddasi («Dezertirlik») bo‘yicha jinoiy ish qo‘zg‘atilgan va u federal, keyin esa xalqaro qidiruvga berilgan. Shundan so‘ng, uning Qozog‘istonda vaqtinchalik yashash ruxsatnomasini uzaytirish imkonsiz bo‘lib qolgan.
Korobov Ostona Bandlik va ijtimoiy himoya boshqarmasiga ikki marta qochqin maqomini olish uchun ariza topshirgan, ammo rad javobini olgan. U Qozog‘iston poytaxti sudida bu qarorni bekor qilolmagan. Advokat Artur Alxastov apellyatsiya shikoyati berishini ma'lum qildi. Uning fikricha, mijozining jang qilishdan bosh tortishi siyosiy sabablarga ko‘ra yuzaga kelgan va shuning uchun o‘z vatanida siyosiy ta'qiblar uchun asos bor.
Sud qarori kuchga kirgandan so‘ng, Korobov Qozog‘istonni 30 kun ichida tark etishi shart bo‘ladi, deb ta'kidladi Alxastov. Agar deportatsiya qilinsa, u 15 yilgacha qamoq jazosiga hukm qilinishi mumkin.
