akorda.kz sayti fotosurati
Qozog‘iston musulmon mamlakatlari va Isroil o‘rtasidagi munosabatlarni normallashtirishga qaratilgan bir qator xalqaro shartnomalardan iborat «Avraam kelishuvlari»ga qo‘shildi. AQSH prezidenti Donald Tramp bu haqda o‘zi, Isroil Bosh vaziri Binyamin Netanyaxu va Qozog‘iston prezidenti Qosim-Jomart To‘qayev o‘rtasidagi qo‘shma telefon qo‘ng‘irog‘idan so‘ng ma’lum qildi (suhbat To‘qayevning Vashingtondagi Oq uy rahbari bilan uchrashuvi paytida bo‘lib o‘tgan).
«Qozog‘iston mening ikkinchi muddatimda «Avraam kelishuvlari»ga qo‘shilgan birinchi davlat bo‘ldi, bu ko‘plab mamlakatlardan birinchisi. Bu butun dunyo bo‘ylab rishtalar bog‘lanishida muhim qadamdir», — deb yozgan Tramp Truth Social ijtimoiy tarmoq platformasida va yaqin orada rasmiy imzolash marosimini e’lon qilishini va’da qilgan.
To‘qayevning matbuot xizmati, o‘z navbatida, Qozog‘iston «Avraam kelishuvlari»ga qo‘shilish orqali «qarama-qarshilikni yengib o‘tishga, muloqotni rivojlantirishga va BMT Nizomiga asoslangan xalqaro huquqni qo‘llab-quvvatlashga hissa qo‘shishga intilayotganini» ta’kidladi.
«Qozog‘istonning qarori mamlakatimizning biron bir davlat bilan ikki tomonlama majburiyatlariga ta’sir qilmaydi, balki tinchlik va xavfsizlikni ta’minlashga qaratilgan ko‘p tomonlama diplomatiyaning tabiiy davomi va namoyonidir», — deb qo‘shimcha qiladi Oqo‘rda.
Axios portali kecha AQSHning yuqori lavozimli amaldoriga tayanib, Ostonaning «Avraam kelishuvlari»ga qo‘shilish niyatini xabar qildi. Uning so‘zlariga ko‘ra, bu harakat asosan ramziy ma’noga ega, chunki Qozog‘iston va Isroil uzoq vaqtdan beri normal diplomatik munosabatlarni saqlab kelmoqda. Maqolada aytilishicha, bu, ehtimol, «Avraam kelishuvlari»ni AQSH boshchiligidagi Isroil va arab va musulmon dunyosi o‘rtasidagi hamkorlikni qayta jonlantirishga qaratilgan, deyiladi maqolada.
«Avraam kelishuvlari» Trampning birinchi muddati davomida 2020 yili AQSH ishtirokida Isroil va uchta arab davlati — Bahrayn, BAA va Marokash o‘rtasida imzolangan normallashtirish shartnomasi. Shartnomalar diplomatik aloqalarni o‘rnatish va elchixonalar ochishni, shuningdek, iqtisodiyot va boshqa sohalarda hamkorlikni nazarda tutadi.
