sputniknews.uz sayti fotosurati
2027 yildan boshlab O‘zbekistonda shifokorlar va hamshiralarning ish haqi samaradorlikning asosiy ko‘rsatkichlari (KPI) asosida belgilanadi. Bunda mutaxassislar faoliyatiga bemorlar tomonidan berilgan baho asosiy mezon bo‘ladi. Bu haqda respublika prezidenti Shavkat Mirziyoyev sog‘liqni saqlash va farmatsevtika sohasi xodimlari bilan uchrashuvda ma’lum qildi, deb xabar beradi davlat rahbarining matbuot xizmati.
Prezident kelasi yil boshidan shifoxona va poliklinikalar faoliyatini baholash mexanizmlarini joriy etishni topshirdi. Bu yerda ham bemorlarning fikri asosiy mezon bo‘ladi.
Fuqarolar shifokorlar va tibbiyot muassasalari faoliyatini aynan qanday tartibda baholashi hozircha ma’lum emas.
Prezidentning so‘zlariga ko‘ra, ixtisoslashtirilgan tibbiyot muassasalarini boshqarish tizimiga ham o‘zgartirishlar kiritish rejalashtirilmoqda. Jumladan, 2027 yildan boshlab 26 ta markaz direktori bilan bir yillik shartnomalar tuziladi. Ularning har biriga davolashning yangi usullarini joriy etish, qo‘l ostidagi xodimlarning malakasini oshirish va ilmiy ishlanmalarni amaliyotda qo‘llash bo‘yicha aniq majburiyatlar yuklatiladi. Tibbiyot markazlari faoliyatini baholashga xorijiy ekspertlar jalb qilinadi. Natijalarga ko‘ra, muassasa rahbari bilan mehnat shartnomasini uzaytirish yoki uni ishdan bo‘shatish to‘g‘risida qaror qabul qilinadi.
Mirziyoyev kelasi yil 1 iyuldan respublikada shifokorlar va farmatsevtlarni davlat ro‘yxatidan o‘tkazish tizimi ishga tushirilishini eslatdi. Dastlab bu jarayon ixtiyoriy bo‘ladi. 2030 yildan esa ro‘yxatdan o‘tish majburiy etib belgilanadi.
Davlat rahbari mutasaddilarga kelasi yili O‘zbekistonning har bir hududiga sog‘liqni saqlash sohasini rivojlantirish uchun kamida 150 million dollarlik investitsiya va grantlarni jalb etishni topshirdi.
Qayd etilishicha, yangi tibbiyot muassasalari aholi soni va hududlarning joylashuvidan kelib chiqib, master-reja asosida tashkil etiladi. Davlat shifoxonalarida tadbirkorlarga zamonaviy uskunalar o‘rnatish uchun joy ajratilib, ko‘rsatilgan xizmatlarga sug‘urta tizimi orqali haq to‘lanadi. Gemodializ, laboratoriya, sterilizatsiya, reabilitatsiya va fizioterapiya xizmatlarini xususiy sektordan xarid qilish kengaytiriladi.
Ixtisoslashgan markazlar tajribasini hududlarga yetkazish maqsadida jarroh, anesteziolog, reanimatolog, assistent va hamshiralardan iborat yaxlit jamoalar joylarga yuboriladi. Hududlardagi tibbiyot guruhlari esa markazlarda uch-to‘rt oylik stajirovkadan o‘tadi.
Prezident, shuningdek, kelgusi yildan kardiologiya, gepatologiya, oftalmologiya va gematologiya kabi yo‘nalishlarda o‘nta sun’iy intellekt tizimi ishga tushirilishini ma’lum qildi.
