Ijtimoiy tarmoqlardan olingan fotosurat. «Buran» kosmik kemasidagi grafiti parchasi
Qozog‘istonda binolarga grafiti, yozuvlar va rasmlar chizganlik uchun yangi jarima joriy etish rejalashtirilmoqda. Bosh vazir Oljas Bektenov Ichki ishlar vazirligiga qonunchilikka tegishli o‘zgartishlar tayyorlashni topshirdi, deb xabar beradi Kursiv.kz nashri.
«Ichki ishlar vazirligi vandalizm va bezorilikning oldini olish maqsadida jamoat joylariga zarar yetkazadigan barcha turdagi grafitilarga to‘liq taqiq qo‘yish bo‘yicha qonunchilikka o‘zgartishlar kiritish bo‘yicha takliflar tayyorlashi kerak», — degan Bektenov 21 sentyabr kuni bo‘lib o‘tgan yig‘ilishda.
O‘z navbatida, Ichki ishlar vaziri Yerjan Sadenov Qozog‘istonda yodgorliklar va tabiiy joylarni tahqirlash bilan bog‘liq 11 ta jinoiy ish tergov qilinganini ma’lum qilgan. Bundan tashqari, politsiya xodimlari ko‘ngillilar bilan birgalikda giyohvand moddalarni reklama qiluvchi taxminan 80 000 ta grafitini o‘chirishgan.
Sadenovning so‘zlariga ko‘ra, mamlakatda giyohvand moddalarni targ‘ib qilish va reklamasi bo‘yicha 81 ta jinoiy ish qo‘zg‘atilgan, ularda 19 kishi sudlangan.
Hukumat yig‘ilishi prezident Qosim-Jomart To‘qayevning «Toza Qozog‘iston» ekologik norozilik namoyishidagi nutqidan bir necha kun o‘tgach bo‘lib o‘tdi. O‘shanda u rasmiylarga bir qator ko‘rsatmalar bergandi, jumladan, jamoat binolarida grafitini taqiqlash borasida.
“ Davlat rahbari Qozog‘iston shaharlarida bunga yo‘l qo‘yib bo‘lmasligiga ishonadi va vandalizm va yovuz bezorilik namunasi sifatida butun dunyo bo‘ylab shahar hududlarini buzayotgan bunday “ijodkorlik”ni butunlay taqiqlash uchun qonunchilik yo‘li bilan tartibga solish choralari ko‘rilishi kerak”, — deb xabar bergandi o‘sha paytda prezident matbuot xizmati.
Tengrinews.kz grafiti bilan bog‘liq eng shov-shuvli ishlarning bir nechta misollarini keltiradi. Masalan, o‘tgan yili noma’lum shaxslar Ostonada LRT vagonlariga raslar chizib tashlashgan. Ish politsiyaga yuborilgan va grafiti maxsus vositalar yordamida o‘chirilgan.
Bir necha yil oldin noma’lum shaxslar Bayqo‘ng‘ir kosmodromiga kirib, tugallanmagan Buran kosmik kemasiga grafiti chizishgan.
Yangi cheklovlar Qozog‘iston shaharlari ko‘chalarida vaqti-vaqti bilan paydo bo‘ladigan devoriy rasmlar (mural) ga taalluqlimi yoki yo‘qmi, hali noma’lum. Ko‘k-Jaylau vohasini himoya qilish uchun shunday asarlardan biri yaqinda Olmaotadagi Mustafina ko‘chasida paydo bo‘lgandi.
