Shavkat Mirziyoyevning Nukusdagi nutqi. O‘zbekiston prezidenti matbuot xizmati fotosurati
Qoraqalpog‘istonning (O‘zbekiston tarkibidagi suveren respublika) sanoat va investitsiya xaritasida yangi Qo‘ng‘irot — Qorao‘zak — Taxiatosh yo‘nalishi paydo bo‘ladi. Vaqt o‘tishi bilan u «yashil sanoat koridori»ga aylanib, «intellektual iqtisodiyot uchburchagi» bo‘ladi. Bu rejalarni mamlakat prezidenti Shavkat Mirziyoyev Nukusda mahalliy faollar va davlat organlari vakillari bilan uchrashuvda ma’lum qildi, deb xabar beradi davlat rahbari matbuot xizmati.
O‘zbekiston rahbari respublikada mavjud yer, mineral va energetika resurslaridan oqilona foydalanish zarurligini ta’kidladi. Buning uchun «resursdan tayyor mahsulotgacha» tamoyili asosida yangi investitsiya xaritasi ishlab chiqiladi. Tashabbuslarning aksariyatini amalga oshirishdan maqsad qo‘shilgan qiymati yuqori bo‘lgan mahsulotlar ishlab chiqarishdan iborat bo‘ladi.
Mirziyoyev sun’iy intellekt texnologiyalarini rivojlantirish va ma’lumotlar markazlarini tashkil etishga alohida e’tibor qaratdi. Gap umumiy qiymati 8 milliard dollar bo‘lgan oltita loyiha haqida bormoqda. Davlat organlari vakillariga besh yillik dastur ishlab chiqish hamda investorlarni quvvati 1 gigavatt bo‘lgan barqaror elektr ta’minoti bilan ta’minlash vazifasi yuklatildi. Shu bilan birga, 1,5 mingta yuqori maoshli ish o‘rni yaratish, shuningdek, bulutli texnologiyalar va sun’iy intellekt sohasida eksport hajmini 600 million dollarga yetkazish vazifalari belgilandi.
Prezident iqtisodiyotni rivojlantirishda energetikaning muhim o‘rnini ta’kidladi. Uning so‘zlariga ko‘ra, so‘nggi yillarda respublikada elektr energiyasi ishlab chiqarish 4 barobarga oshib, 5,3 milliard kilovatt-soatdan ziyodni tashkil etdi. Bu aholi va korxonalarning yillik ehtiyojidan uch barobar ko‘p. Biroq yangi energetika obyektlarini ishga tushirish davom etmoqda. Shu bois 2030 yilga qadar umumiy quvvati 3,3 ming MVt bo‘lgan shamol elektr stansiyalarini ishga tushirish, «yashil» energiya ulushini 76 foizga yetkazish va 400 megavatt quvvatda energiya saqlash tizimlarini yaratish rejalashtirilmoqda.
Shuningdek, Qoraqalpog‘istonda «yashil» energiyani «karbon kreditlari»ga aylantirish hisobiga yiliga 100 million dollargacha daromad olish imkoniyati mavjud. O‘zbekiston rahbari mutasaddilarga tegishli mexanizmni ishga tushirish va yirik import qiluvchi davlatlar bilan muzokaralar o‘tkazish vazifasini topshirdi.
Qayd etilishicha, geologik tadqiqotlar viloyat hududining atigi 20 foizida o‘tkazilgan. Shu munosabat bilan bu yerda oltin qazib olish va qayta ishlash klasterini tashkil etish, konlarni o‘zlashtirish hamda foydali qazilmalar zaxiralarini baholash bo‘yicha kompleks dastur ishlab chiqish topshirildi.
Mirziyoyev to‘qimachilik va charm sanoati, elektrotexnika, qurilish materiallari, avtomobil butlovchi qismlari va farmatsevtika mahsulotlari ishlab chiqarishga taalluqli yuzlab million dollarlik tashabbuslarni amalga oshirish ustidan nazoratni kuchaytirish zarurligini ta’kidladi.
Qoraqalpog‘iston hukumatiga 2027 yilda 5 milliard dollar miqdorida investitsiya jalb etish vazifasi yuklatildi.
Bundan tashqari, qishloq xo‘jaligi va chorvachilik sohalaridagi katta salohiyat haqida so‘z bordi. Ushbu tarmoqlar suvni tejaydigan texnologiyalar, imtiyozli kreditlash dasturi hamda muvaffaqiyatli fermerlar va agronomlar tajribasidan foydalangan holda rivojlantiriladi.
Prezident kelasi yil mart oyidan Toshkent — Nukus yo‘nalishida yuqori tezlikda harakatlanadigan poyezd qatnovini yo‘lga qo‘yishni ma’lum qildi. Buning natijasida yo‘l vaqti 16 soatdan 7 soatga qisqaradi. Shuningdek, suv tozalash inshootini rekonstruksiya qilish va Qo‘ng‘irotdan Mo‘ynoqqacha suv quvuri qurish ishlari boshlanadi. Bundan tashqari, Qoraqalpog‘iston poytaxtida 50 ming aholiga mo‘ljallangan, xizmat ko‘rsatish obyektlari va yashil xiyobonlarga ega «Nukus siti» majmuasi qurilishi boshlangani ta’kidlandi.
Ta’lim va tibbiy xizmat ko‘rsatish masalalariga ham katta e’tibor qaratildi. Yoshlarni zamonaviy kasblarga, jumladan, IT va logistika sohalariga o‘qitish tizimini kuchaytirish zarurligi ta’kidlandi. Sog‘liqni saqlash sohasida esa aholiga tibbiy yordamni tez va sifatli ko‘rsatish uchun yuqori texnologiyalardan keng foydalanish lozimligi qayd etildi. Respublikada shifoxonalar, sport markazlari, sanatoriylar va madaniyat obyektlari soni ortib borayotgani ta’kidlandi.
Mirziyoyev so‘nggi yillarda Qoraqalpog‘istonni rivojlantirish uchun davlat budjetidan salmoqli mablag‘lar ajratilganini qayd etdi. Shu bilan birga, imtiyoz va preferensiyalar joriy qilindi. Jumladan, foyda, yer va mol-mulk soliqlari ikki barobar kamaytirildi, sanoat korxonalari uchun elektr energiyasi tarifi 15 foizga pasaytirildi, ijtimoiy soliq stavkasi esa 1 foiz etib belgilandi.
Prezidentning so‘zlariga ko‘ra, o‘tgan yili respublika 1,7 milliard dollar miqdorida investitsiya olgan. Bu 2021 yildagi ko‘rsatkichdan 22 barobar ko‘p. Natijada o‘tgan yili mintaqa iqtisodiyoti 10,2 foizga o‘sib, Toshkentdan keyin O‘zbekistonda ikkinchi o‘rinni egalladi.
