Qozog‘iston Sanoat va qurilish vazirligi matbuot xizmati fotosurati
Markaziy Osiyo davlatlari va Janubiy Koreya sanoat vazirlarining Seulda «S5+1» formatida bo‘lib o‘tgan birinchi yig‘ilishida muhim minerallar sohasini birgalikda rivojlantirish hamda sun’iy intellekt texnologiyalaridan foydalangan holda «aqlli» korxonalar tashkil etish bo‘yicha kelishuvga erishildi. Bu haqda Koreya Savdo, sanoat va resurslar vazirligi matbuot xizmati xabar berdi.
Qabul qiluvchi tomon vakillari Qozog‘iston, Qirg‘iziston, Tojikiston, Turkmaniston va O‘zbekistondagi hamkasblari bilan aloqalarni faol qo‘llab-quvvatlayotganini ta’kidladi. Biroq, mintaqadagi barcha davlatlarning tegishli idoralari rahbarlari ishtirokidagi muzokaralar ilk bor o‘tkazilmoqda.
Uchrashuvda Koreya va Markaziy Osiyo davlatlari o‘rtasidagi hamkorlikning ustuvor yo‘nalishlari muhokama qilindi. Xususan, vazirlar litiy va kamyob yer elementlari kabi strategik muhim minerallarning butun ta’minot zanjiri bo‘ylab hamkorlikni kuchaytirishga kelishib oldilar. Markaziy Osiyo respublikalarining resurs bazasini Koreyaning ilg‘or qayta ishlash texnologiyalari bilan birlashtirish masalasi muhokama qilindi.
Shuningdek, Koreya kompaniyalari hamkor davlatlar bilan kooperatsiya qilish va ularga yuqori qo‘shilgan qiymatga ega tayyor mahsulotlar ishlab chiqarishni yo‘lga qo‘yishda yordam berish istagini bildirdi.
Sammit ishtirokchilari sun’iy intellekt asosidagi Koreya texnologiyalarini ishlab chiqarish jarayonlariga joriy etish orqali qayta ishlash sanoatini rivojlantirishga qaror qildi. Shu tariqa, Markaziy Osiyoda «aqlli» zavodlar paydo bo‘ladi va bu butun mintaqadagi ishlab chiqarish korxonalarining transformatsiyasiga olib keladi.
Savdo sohasidagi hamkorlikni kengaytirish va sanoat infratuzilmasini modernizatsiya qilish maqsadida import-eksport operatsiyalari doirasidan chiqish, Markaziy Osiyoda amalga oshirilayotgan yirik loyihalarda Koreyaning faol ishtirokini ta’minlash orqali hamkorlik sifatini oshirish taklif etildi. Gap integratsiyalashgan ishlab chiqarish majmualari, intellektual infratuzilma va zavod jihozlarini yangilash haqida bormoqda.
Koreya Savdo vaziri Kim Jong Gvan sammitda so‘zga chiqib, bir vaqtlar Markaziy Osiyo hududidan o‘tgan savdo karvonlarining yangilikka intilish ruhini tilga oldi.
«Keling, Koreyaning ilg‘or texnologiyalari va ishlab chiqarish imkoniyatlaridan Markaziy Osiyoning ulkan o‘sish salohiyatini ro‘yobga chiqarish va butun Yevrosiyoning keyingi taraqqiyotini rag‘batlantirish katalizatori sifatida foydalanib, rivojlangan sanoat ekotizimi sari yangi yo‘lni birgalikda barpo etaylik», — dedi vazir.
Seuldagi uchrashuv yakuniga ko‘ra, «Koreya Respublikasi — Markaziy Osiyo» sanoat vazirlari maslahat mexanizmining birinchi yig‘ilishi bo‘yicha Qo‘shma bayonot, shuningdek, sanoat va ta’minot zanjirlari sohasida hamkorlik to‘g‘risida memorandum imzolandi.
Kim Jong Gvan Markaziy Osiyo respublikalaridagi hamkasblari bilan ikki tomonlama muzokaralar ham o‘tkazdi. Uchrashuvlar yakunida bir qator hujjatlar imzolandi. Jumladan, O‘zbekiston bilan strategik muhim foydali qazilmalarni izlash va o‘zlashtirish, eksport salohiyatini rivojlantirish hamda savdo sherikligini yo‘lga qo‘yish bo‘yicha qo‘shma platforma tashkil etish haqida kelishuvlarga erishildi. Qozog‘iston bilan esa Koreya lift sanoatida ilmiy-tadqiqot parki loyihasini amalga oshirish uchun qo‘shma korxona tashkil etish istiqbollarini muhokama qildi.
