osnmedia.ru sayti fotosurati
Namangan viloyati Jinoyat ishlari bo'yicha Uychi tumani sudi Rossiya armiyasi safida Ukrainaga qarshi jang qilgan 28 yoshli mahalliy fuqaroga nisbatan hukm chiqardi. Yollanma askarning jazosi to'rt yilga ozodlikni cheklashgacha qisqartirildi, deb xabar beradi «Gazeta.uz».
Tergov hujjatlariga ko'ra, o'zbekistonlik 2020 yili Rossiyaga ishlash uchun ketgan. U o'sha yerda giyohvand moddalar savdosi bilan bog'liq jinoiy ishga aralashib qolgan. 2022 yil noyabr oyida migrant yetti yilga ozodlikdan mahrum qilingan
2025 yil yanvar oyida mahbus Rossiya Mudofaa vazirligi bilan shartnoma imzolagan va Ukrainaga qarshi jang qilishga rozilik bergan. Sudlanuvchining so'zlariga ko'ra, unga oyiga 130 ming rubl maosh (taxminan 1800 dollar), 1,5 mln rubl (20 500 dollar), miqdorida bir martalik mukofot puli, shuningdek, afv etilish va Rossiya fuqaroligini olish imkoniyati va'da qilingan. Shartnoma shartlari bajarilganmi yoki yo'qmi, bu haqda ma'lumot berilmagan.
Sudlanuvchi kelishuvni imzolagandan so'ng, Sverdlovsk viloyatidagi harbiy poligonda 40 kunlik tayyorgarlikdan o'tgan va «oddiy askar» harbiy unvoni bilan xizmatga kirishgan.
Uning ko'rsatmalariga ko'ra, Rossiyaning Kursk viloyatidagi jangovar operatsiyalarda ishtirok etgan. U dron hujumida oyog'idan jarohat olgan va 2025 yil kuzigacha davolangan. Sog'lig'i sababli ta'tilda bo'lganida, yollanma askar Moskvadagi O'zbekiston elchixonasi bilan bog'lanib, vataniga qaytish uchun sertifikat olgan va o'tgan yil oktyabrь oyida uyiga qaytgan.
Sud fuqaroni O'zbekiston Jinoyat kodeksining 154-moddasi 1-qismi («Yollanish») bilan aybli deb topgan va Jinoyat kodeksining 57-moddasini («Engilroq jazo tayinlash») qo'llagan. Jazo tayinlashda sud uning aybiga to'liq iqror bo'lgani, qilmishidan chin ko'ngildan pushaymonligi, muqaddam sudlanmagani hamda oilada yagona boquvchi ekanini inobatga olgan. Shuningdek, uning qaramog'ida keksa ota-onasi borligi ham yengillashtiruvchi holat sifatida baholangan.
Hukmga ko'ra, Ukrainadagi urushning sobiq ishtirokchisiga ish yoki o'qishdan tashqarida yashash joyini tark etish va huquqni muhofaza qilish organlari ruxsatisiz Namangan viloyatidan tashqariga chiqish taqiqlangan.
ℹ️ O'zbekistonda shunga o'xshash sud jarayonlari bir necha bor xabar berilgan. Ba'zi hollarda sudlar yollanma askarlarni qamoq jazosiga hukm qilgan, boshqalarida esa ozodlikdan mahrum qilishni nazarda tutmagan yengilroq jazolarni qo'llagan. Masalan, yaqinda «Farg'ona» Rossiya armiyasida oshpaz bo'lib xizmat qilganini va hech qachon qo'liga qurol olmaganini da'vo qilgan migrant haqida xabar bergandi. Ushbu iqrorga qaramay, fuqaro uch yilga ozodlikdan mahrum qilingan.
