Kohir Rasulzoda i Abdulla Aripov. «Xovar» sayti fotosurati
Tojikiston va O‘zbekiston o‘zaro savdo hajmini 2 milliard dollarga yetkazish niyatida. Ushbu kelishuvga 17 fevral kuni Dushanbeda Bosh vazirlar Kohir Rasulzoda (Tojikiston) va Abdulla Aripov (O‘zbekiston) ishtirokida Savdo-iqtisodiy hamkorlik bo‘yicha hukumatlararo komissiyaning 13-yig‘ilishida erishildi, deb xabar beradi «Xovar».
Uchrashuv davomida tomonlar savdo va investitsiyalar, energetika, sanoat, qishloq xo‘jaligi, transport, bojxona, ta'lim va madaniyat sohalaridagi hamkorlikni kengaytirish masalalarini muhokama qilishdi. Sanoat hamkorligini mustahkamlash qo‘shma faoliyatning ustuvor yo‘nalishi bo‘lib qolayotgani ta'kidlandi. Uchrashuv yakunida hukumatlararo komissiyaning qo‘shma faoliyati to‘g‘risidagi protokol imzolandi.
Tojikiston tomonining ma'lumotlariga ko‘ra, 2025 yili mamlakatlar o‘rtasidagi savdo aylanmasi 718,3 million dollarni tashkil etgan, bu 2024 yilga nisbatan 22,5 foizga ko‘pdir.
Shu kuni O‘zbekiston Bosh vaziri Abdulla Aripov Tojikiston prezidenti Emomali Rahmon bilan uchrashdi. Tojikiston rahbari matbuot xizmatining xabar berishicha, uchrashuvda strategik sheriklik va ittifoqchilik hamkorligiga asoslangan Tojikiston-O‘zbekiston munosabatlarini rivojlantirish va kengaytirish istiqbollari muhokama qilindi.
Shuni ta'kidlash lozim, savdo aylanmasini 2 milliard dollarga yetkazish rejalari birinchi marta 2024 yil bahorida prezident Shavkat Mirziyoyevning Tojikistonga tashrifi davomida Dushanbeda bo‘lib o‘tgan O‘zbekiston-Tojikiston investitsiya va biznes forumida ma'lum qilingandi. O‘shanda mamlakatlar o‘rtasidagi o‘zaro savdo so‘nggi sakkiz yil ichida uch baravarga oshganligi, 2023 yili 750 million dollarga yetgani va 2024 yil boshidan beri yana 40 foizga oshgani ta'kidlangan edi.
