irishmirror.ie sayti fotosurati
2026 yil sentyabridan boshlab O‘zbekistonda ta’lim, sog‘liqni saqlash va ijtimoiy xizmatlar sohalaridagi xodimlarga voyaga yetmaganlarga nisbatan zo‘ravonlikning ma’lum holatlarini yashirganlik uchun ma’muriy jazo choralari joriy etiladi. Bu prezident Shavkat Mirziyoyevning «2026–2030-yillarga mo‘ljallangan Bolalarni barcha turdagi zo‘ravonlikdan himoya qilish strategiyasini tasdiqlash to‘g‘risida»gi farmonida ko‘zda tutilgan. Hujjat 24 dekabr kuni e’lon qilindi.
Mulkchilik shaklidan qat’i nazar ta’lim, sog‘liqni saqlash va aholini ijtimoiy himoya qilish tashkilotlari xodimlari tomonidan bolalarga nisbatan zo‘ravonlik bilan bog‘liq aniqlangan faktlar haqida xabar bermaganlik uchun ma’muriy javobgarlik joriy etiladi. Farmonda Ichki ishlar vazirligi, Bosh prokuratura va Adliya vazirligiga uch oy ichida tegishli qonunchilikka o‘zgartirish va qo‘shimchalar tayyorlash topshirilgan.
Bundan tashqari, 2026 yil 1 sentyabrdan boshlab zo‘ravonlik qurbonlari yoki guvohlari bo‘lgan bolalarga davlat hisobidan bepul yuridik yordam ko‘rsatiladi.
Agar zo‘ravonlik bolaning qarindoshlari yoki qonuniy vakillari tomonidan sodir etilgan bo‘lsa, tergov va sud jarayonining barcha bosqichlarida vasiylik va homiylik organlari vakillarining ishtiroki majburiy bo‘ladi.
Zo‘ravonlikdan jabrlangan bolalarning dastlabki ko‘rsatmalari majburiy tartibda videoyozuv orqali qayd etiladi. Bu tergov davomida jabrlanuvchilarni psixologik travmaga olib keluvchi takroriy so‘roqlardan xoli qiladi.
Bolalar va jinsiy jinoyatlarda gumon qilinuvchilar o‘rtasidagi yuzma-yuz uchrashuvlar faqat tergovchi, prokuror yoki sudning maxsus qarori bilan amalga oshiriladi.
2026 yil aprel oyiga qadar «Raqamli hukumat» ma’lumotlar bazasi va 112 xizmati bilan integratsiyalashgan Yagona elektron platformani ishga tushirish rejalashtirilgan. Ushbu tizim himoyaga muhtoj bolalar va zo‘ravonlik sodir etgan yoki unga moyil bo‘lgan shaxslar haqida ma’lumotlarni to‘playdi. Platforma yagona statistik yozuvlarni taqdim etadi va har bir zo‘ravonlik holatiga davlat idoralarining munosabatini kuzatib boradi.
Huquqni muhofaza qilish organlari xodimlarining malakasini oshirish uchun 2026 yil fevral oyidan boshlab qisqa muddatli kurslar tashkil etiladi. Unda bolalarga nisbatan zo‘ravonlik holatlari bilan ishlaydigan surishtiruvchilar, tergovchilar, prokurorlar, sudyalar va advokatlar malaka oshiradi.
