Surxondaryo viloyatiga kirish joyi. Videodan kadr
Surxondaryodagi qazilma boyliklar 600 milliard dollarga baholanadi, biroq bugungi kunda bu salohiyatning hatto 10 foizi ham ishga solinmagan. 24 dekabr kuni prezident Shavkat Mirziyoyev ishtirok etgan yig‘ilishda ushbu ma’lumotlar tilga olindi.
Yig‘ilishda Surxondaryoning ijtimoiy-iqtisodiy rivojlanishiga e’tibor qaratildi. Prezident boy tabiiy resurslari va rivojlangan infratuzilmasiga qaramay, mintaqa mamlakatning boshqa hududlaridan sezilarli darajada orqada qolayotganini ta’kidladi. Surxondaryoda sanoat ishlab chiqarish Sirdaryo viloyatiga qaraganda 1,5 baravar past. U Jizzax viloyatidan 1,8 baravar, Xorazm viloyatidan esa ikki baravar orqada.
Meva-sabzavot eksporti ham Samarqand, Toshkent viloyati, Farg‘ona va Xorazm ko‘rsatkichlaridan past. Shu munosabat bilan viloyatni investitsiya, ish o‘rni, aholi daromadi va eksport sur’atlari eng tez o‘sadigan hududga aylantirish vazifasi qo‘yildi.
Mavjud vaziyatni o‘zgartirish uchun kelgusi yilda viloyatda aniqlangan 114 ta qazilma konlari zaxirasi asosida yangi loyihalarni amalga oshirish, ushbu konlarda 3,2 milliard dollarlik 91 ta loyihani boshlash, shundan 2 milliard dollarlik qismini ishga tushirish rejalari belgilandi.
Shuningdek, drayver loyihalar infratuzilmasiga 175 milliard so‘m (14,5 million dollar) ajratiladi, buning hisobiga 1 trillion 200 milliard so‘mlik (100 million dollar) 36 ta loyiha amalga oshirilib, 9 mingta ish o‘rni barpo etiladi.
Yaratilgan shart-sharoitlar va berilgan imtiyozlar hisobiga so‘nggi sakkiz yilda viloyatga 3 milliard dollar xorijiy investitsiya jalb qilingan, 4 mingta sanoat korxonasi ishga tushirilgan. Sanoat hajmi ikki barobarga oshib, joriy yilda 17,2 trillion so‘mga (1,4 milliard dollar) yetishi kutilmoqda. Hukumat kambag‘allik darajasi 9,3% dan 5,6% gacha pasayishini bashorat qilmoqda, bu esa 126 000 oila kambag‘allikdan chiqqanini anglatadi.
Ijtimoiy muammolarni hal qilishga alohida e’tibor qaratildi. «To‘palang» suv omboridan quvur tortish orqali Sherobod, Boysun, Bandixon, Muzrabot, Oltinsoy, Angor, Jarqo‘rg‘on va Denov tumanlarida yashovchi 2 million aholining ichimlik suv muammosi to‘liq hal etildi.
Viloyatning turizm sohasi tanqid ostiga olindi. Viloyatda atigi 47 ta mehmonxona faoliyat yuritayotgani, 4 va 5 yulduzli yoki brend mehmonxonalar mavjud emasligi qayd etildi. Boysun, Sangardak va Omonxona kabi yuqori turistik salohiyatga ega hududlar imkoniyatlarini to‘liq ishga solib, mehmonxonalar sonini ko‘paytirish, yangi turizm yo‘nalishlari va obyektlarini tashkil etish zarurligi qayd etildi.
Qishloq xo‘jaligida ishlab chiqarish nomutanosibligi mavjud. Hozirda meva-sabzavotlarning 60% Denov, Sherobod, Qumqo‘rg‘on va boshqa bir qator tumanlarda yetishtiriladi. Davlat rahbari Angor, Qiziriq, Termiz, Uzun hamda ixtisoslashgan boshqa tumanlarda ham eksportni ko‘paytirish bo‘yicha aniq loyihalar ishlab chiqish vazifasi qo‘ydi.
Yig‘ilishda Surxondaryo viloyati hokimi shu kabi imkoniyatlarni ishga solish bo‘yicha rejalarini taqdimot qildi. Davlat rahbari hududda yo‘llarni ta’mirlash, uy-joy qurish va ijtimoiy infratuzilmani yaxshilash bo‘yicha qo‘shimcha ko‘rsatmalar berdi.
