Shavkat Mirziyoyev Toshkent davlat tibbiyot universitetida. O‘zbekiston prezidenti matbuot xizmati fotosurati
O‘zbekiston prezidenti Shavkat Mirziyoyev sog‘liqni saqlash sohasida raqamlashtirishni jadallashtirishni buyurdi, bu bemorlar uchun qulaylik, shifokorlar uchun samaradorlik va davlat uchun resurslarni tejashni ta’minlaydi. Davlat rahbari bu haqda 10 noyabr kuni Toshkent davlat tibbiyot universitetida bo‘lib o‘tgan tegishli tashabbuslar taqdimotida ma’lum qildi, deb xabar beradi uning matbuot xizmati.
Rasmiylarning so‘zlariga ko‘ra, so‘nggi yillarda sog‘liqni saqlashni rivojlantirish uchun 230 trillion so‘m (19 milliard dollardan ortiq) ajratilgan. Ushbu mablag‘lar hududlarda 187 ta yangi klinika va kasalxonalarni foydalanishga topshirishga sarflandi, 1244 ta muassasa rekonstruksiya qilindi va zamonaviy uskunalar bilan jihozlandi.
Natijada birlamchi tibbiyot muassasalari quvvati 60 foizga oshib, tibbiy xizmat aholiga ancha yaqinlashdi. Ilgari asosan poytaxtda bajarilgan yuqori texnologik va diagnostika-davolash usullarining 400 dan ortig‘i hududlarda amalga oshirilmoqda.
Yuzlab murakkab amaliyotlar viloyat markazlariga, kam invaziv operatsiyalar tuman darajasiga tushirildi. Birinchi marta 45 ta tumanda buyrak ko‘chirib o‘tkazish amaliyoti yo‘lga qo‘yildi.
So‘nggi yillarda yurtimiz tibbiyotida ilg‘or texnologiyalar joriy etilib, ta’lim jarayonlariga ham keng tatbiq qilinmoqda. Xususan, uchta oliy ta’lim muassasasi negizida Toshkent davlat tibbiyot universiteti tashkil etildi. Urganch davlat tibbiyot instituti faoliyati yo‘lga qo‘yildi. Sakkizta tibbiyot oliy ta’lim muassasasi xalqaro akkreditatsiyadan o‘tdi. Bu sohada zamonaviy bilim va ko‘nikmalarga ega kadrlar tayyorlash imkoniyatlari yanada kengaydi.
Toshkent davlat tibbiyot universitetida infratuzilma yaxshilanishi natijasida ta’lim oluvchilar soni 29 ming 864 nafarga yetdi. O‘quv jarayonlari eng zamonaviy talablar darajasiga ko‘tarildi, raqamlashtirish faol davom etmoqda.
Yig‘ilishda sog‘liqni saqlash sohasida yangi texnologiyalardan foydalanishga alohida e’tibor qaratildi. Mamlakat bo‘ylab muassasalar innovatsion yechimlar bilan jihozlangani va yagona infratuzilma yaratilgani ta’kidlandi. 2024-2025 yillari 3000 dan ortiq tibbiyot tashkilotlari mahalliy tarmoqlarga ulandi va ularning texnik infratuzilmasi yangilandi.
Prezidentga DMED yagona elektron axborot tizimi imkoniyatlari ham taqdim etildi. Bu tizim orqali 36 million nafardan ziyod fuqarolarning tibbiy ma’lumotlari yagona bazada jamlandi. Tez tibbiy yordam xizmatida elektron boshqaruv yo‘lga qo‘yilib, chaqiriqlarga yetib borish vaqti 25-30 daqiqadan 10-15 daqiqagacha qisqartirildi. Yaqin kelajakda Online-shifokor xizmati joriy etilib, aholiga masofadan tibbiy maslahat berish imkoni yaratiladi.
Shuningdek, «Elektron retsept» tizimi faoliyati yo‘lga qo‘yilishi natijasida ortiqcha dori yozish holatlari 40 foizga kamaydi, dori vositalari aylanmasi shaffoflashdi. Barcha tibbiy ma’lumotlar biometrik himoya ostida saqlanib, shaxsiy ma’lumotlar xavfsizligi ta’minlanmoqda.
«Zamonaviy tibbiyot muassasalarini barpo etyapmiz, sohada sun’iy intellektni joriy qilyapmiz, eng ilg‘or uskunalarni olib kelyapmiz. Bu o‘zgarishlar eng quyi bo‘g‘ingacha yetib borishi zarur. Eng muhimi, har bir tibbiyot xodimining malakasini oshirish, zamonaviy bilim va ko‘nikmalar bilan ta’minlashga e’tibor qaratishimiz lozim. Shundagina harakatlarimiz natija beradi», — dedi Mirziyoyev.
