Donald Tramp va Emomali Rahmon. Tojikiston prezidenti matbuot xizmati fotosurati
Qo‘shma Shtatlar va Tojikiston 3 milliard dollardan ortiq qiymatdagi tijorat bitimlarini tuzdi. «Markaziy Osiyo-AQSH» sammiti doirasida ikki mamlakat prezidentlari Donald Tramp va Emomali Rahmon mamlakatlar o‘rtasidagi hamkorlikni kengaytirish masalalari muhokama qildi, deb xabar beradi AQSH Davlat departamenti matbuot xizmati.
Departamentning ta’kidlashicha, Tojikistonning «Somon Eyr» aviakompaniyasi Amerikaning Boeing korporatsiyasi bilan samolyotlar va aviatsiyani qo‘llab-quvvatlash tizimlarini sotib olish bo‘yicha yirik kelishuvga erishgan. Dastlabki ma’lumotlarga ko‘ra, tomonlar 3,2 milliard dollarlik shartnoma imzolaydilar. Buyurtma Qo‘shma Shtatlarda taxminan 11 500 ish o‘rni yaratadi. Davlat departamentining qo‘shimcha qilishicha, ushbu qo‘shma loyiha Tojikiston hukumatining AQSH aerokosmik texnologiyalariga bo‘lgan ishonchini namoyish etadi.
Markaziy Osiyo respublikasi vakillari Transparent Earth bilan Tojikiston iqtisodiyotining konchilik va qishloq xo‘jaligi sohalarida tashabbuslarni amalga oshirishda texnik yordam ko‘rsatishga oid shartnoma imzoladilar. Xususan, loyiha masofaviy zondlashga, jumladan, muhim minerallarni qazib olish mumkin bo‘lgan sohalarga tegishli. Bitim qiymati 32,5 million dollarga baholanmoqda.
Coca-Cola Dushanbedagi zavodiga qo‘shimcha 9 million dollar sarmoya kiritishga qaror qildi. Bu poytaxtda mashhur brend ostida ishlab chiqariladigan mahsulotlar ishlab chiqarish va turlarini kengaytiradi.
Bundan tashqari, bir qator IT loyihalari haqida xabarlar mavjud. Masalan, Tojikiston mamlakatga raqamli infratuzilma taqdim etilishi borasida Starlink bilan hamkorlik qilishga kelishib oldi.
Perplexity AI va Zypl AI kompaniyalari Tojikistondagi davlat idoralari uchun moslashtirilgan sun’iy intellekt (SI) asosida ishlaydigan brauzerni joriy etish loyihasida ishtirok etishini tasdiqladilar.
Shu bilan birga, Zypl AI kompaniyasi SuperMicro va Cerebris bilan birgalikda mamlakatda joylashgan ma’lumotlar markazlari uchun SI infratuzilmasini rivojlantirish niyatida. Ushbu loyihaning amalga oshirilishi mamlakatga Markaziy Osiyoda IT xizmatlari va sun’iy intellekt texnologiyalari eksportida yetakchi bo‘lish imkonini berishi mumkin.
