yuz.uz sayti fotosurati
2026 yil 1 yanvardan boshlab O‘zbekiston 2600 ta retsept bo‘yicha beriladigan dori-darmonlarning o‘rtacha narxlarini pasaytirishni rejalashtirmoqda. Ushbu dorilar narxi 40-50% ga pasayishi kutilmoqda. Bu haqda prezident Shavkat Mirziyoyev raisligida 3 noyabr kuni tibbiyot va farmatsevtika sanoatidagi islohotlarga bag‘ishlangan yig‘ilishda so‘z yuritildi, deb xabar beradi davlat rahbari matbuot xizmati.
Shuningdek, davlat rahbariga Tashkent Pharma Park sanoat zonasi va umuman sanoatning holati haqida ma’lumot berildi. Tarmoq korxonalari tomonidan qiymati 5 trillion so‘mlik mahsulotlar ishlab chiqarilgan, 172 million dollarlik mahsulotlar eksport qilingan hamda 286 million dollar investitsiya, shundan 257 million dollar xorijiy sarmoyalar o‘zlashtirilgan.
Bugungi kunda 35 ta mahalliy korxona tomonidan 205 turdagi dori vositalarini ishlab chiqarish yo‘lga qo‘yilgan, ular eksport qilinayotgan davlatlarning soni esa 55 taga yetgan. Shu yilning o‘zida qiymati 29 million dollarlik 16 ta loyiha ishga tushirilgan hamda 830 ta yangi ish o‘rinlari yaratilgan.
Yig‘ilishda farmatsevtika mahsulotlarini davlat xaridlari mexanizmlarini takomillashtirish masalalari muhokama qilindi. Korrupsiyaning oldini olish uchun barcha bitimlar farma.xarid.uz platformasi orqali amalga oshirilishi kerakligi ta’kidlandi. Bundan tashqari, jarayonda faqat zarur sifat sertifikatlariga ega kompaniyalar ishtirok etishi mumkin va xarid hajmi, shuningdek, ishlab chiqaruvchilar va distribyutorlar ro‘yxati ommaga e’lon qilinadi.
Bundan tashqari, Mirziyoyev 2026 yil 1 yanvardan boshlab davlat tibbiyot muassasalarining dori-darmon va uskunalarga bo‘lgan ehtiyojlarini aniqlash uchun veb-resurs yaratishni buyurdi.
Prezidentga, shuningdek, aholini sifatli, xavfsiz va samarador dori vositalari bilan ta’minlash maqsadida dori vositalari va tibbiy jihozlarni davlat ro‘yxatidan o‘tkazishning yangi tartibi taqdimot qilindi.
Unga ko‘ra, dori vositalarini texnologiyalar transferi orqali ishlab chiqarish yo‘lga qo‘yiladi. Xorijiy farmatsevtika kompaniyalari tomonidan mahalliy ishlab chiqaruvchilarning quvvatlaridan foydalangan holda ishlab chiqarish va tezlashtirilgan tartibda davlat ro‘yxatidan o‘tkazish imkoni yaratiladi.
Prezident taqdim etilgan tashabbuslarni ma’qullab, yil oxiriga qadar 166 million dollarlik 32 ta loyihani ishga tushirish, 1500 ta ish o‘rni yaratish, ishlab chiqarish va eksportni ko‘paytirish va retsept bo‘yicha beriladigan dorilar narxini pasaytirishni buyurdi.
Taqdimotda kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam ko‘rsatishni tashkil etish bo‘yicha ishlab chiqilgan 2026-2030 yillarga mo‘ljallangan chora-tadbirlar dasturi to‘g‘risida axborot berildi. Unga ko‘ra, endilikda davolanishi davlat hisobidan qamrab olinadigan kasalliklarning soni 5 tadan 10 taga kengaytiriladi, yosh chegarasi 18 dan 21 ga uzaytiriladi.
Dasturni amalga oshirish uchun 961 milliard so‘m mablag‘ yo‘naltirilishi ko‘zda tutilmoqda.
