Aqlli fotoelektrik (PV) va energiyani saqlash texnologiyalari sohasidagi global yetakchilardan biri bo‘lgan Trinasolar O‘zbekistonning Xorazm viloyatida joylashgan 126 MVt quvvatga ega Sarimay quyosh elektr stansiyasi loyihasi uchun 184 328 ta 695 Vt quvvatli Vertex N modulini yetkazib berdi.
Loyiha to‘liq ishga tushirilgan bo‘lib, Sarimay quyosh elektr stansiyasi hozirda O‘zbekistonning milliy elektr tarmog‘iga qayta tiklanuvchi energiya manbalaridan ishlab chiqarilgan elektr energiyasini yetkazib bermoqda.
O‘zbekiston 2030-yilgacha elektr energiyasi ishlab chiqarishning 40 foizini qayta tiklanuvchi energiya manbalari hisobidan ta’minlash maqsadida keng ko‘lamli quyosh va shamol energetikasi loyihalarini rivojlantirmoqda. Sarimay quyosh elektr stansiyasi mamlakatning ushbu strategik maqsadini amalga oshirish yo‘lidagi muhim loyihalardan biridir.
Sarimay quyosh elektr stansiyasi qurilishi 2024-yil may oyida boshlangan. Stansiya 2025-yil noyabr oyida, to‘liq ishga tushirilishidan avval, dastlabki megavatt-soat elektr energiyasini ishlab chiqara boshlagan. Uzunligi uch kilometr bo‘lgan elektr uzatish liniyasi stansiyani O‘zbekiston milliy elektr tarmog‘iga ulaydi. Bu esa ishlab chiqarilgan elektr energiyasini “O‘zbekiston milliy elektr tarmoqlari” AJga yetkazib berish imkonini beradi.
Taxminan 180 gektar maydonni egallagan Sarimay quyosh elektr stansiyasi yiliga qariyb 252 gigavatt-soat qayta tiklanuvchi elektr energiyasi ishlab chiqarishi kutilmoqda. Bu qariyb 60 ming nafar aholining elektr energiyasiga bo‘lgan ehtiyojini qoplashga teng. Shuningdek, quyosh elektr stansiyasi har yili 140 ming tonnadan ortiq karbonat angidrid chiqindilarining oldini olishga yordam beradi.
Mazkur natijalar O‘zbekiston energetika tizimiga qayta tiklanuvchi energiya quvvatlarini bosqichma-bosqich qo‘shib borayotgan bir paytda, har bir yirik energetika loyihasi mamlakatning ushbu yo‘nalishdagi maqsadlariga sezilarli hissa qo‘sha olishini ko‘rsatadi.
Keng miqyosdagi energetika loyihasi bo‘lgan Sarimay quyosh elektr stansiyasida Trinasolarning Vertex N 695 Vt (NEG21C.20) modullaridan foydalanilgan. Ushbu modullarda n-tipli i-TOPCon ilg‘or quyosh elementi texnologiyasi bifatsial, ikki oynali konstruksiya bilan uyg‘unlashtirilgan.
Modullar O‘zbekistonning quruq kontinental iqlimi sharoitida foydalanish uchun juda mos keladi. Bu hududda yozning issiq va quruq kelishi, fasllar davomida haroratning keskin o‘zgarishi, shuningdek, qum va chang ta’siri uskunalar uchun murakkab ekspluatatsiya sharoitlarini yuzaga keltiradi. Past harorat koeffitsiyenti yuqori harorat sharoitida quvvat yo‘qotilishini kamaytirishga yordam beradi. Qum ta’siri va potensial induksiyalangan degradatsiyaga (PID) chidamlilik bo‘yicha o‘tkazilgan sinovlar esa modullarning uzoq muddatli barqarorligini ta’minlashga xizmat qiladi.
Shuningdek, modullarga 30 yillik quvvat kafolati berilgan bo‘lib, bu 25 yillik ekspluatatsiya muddatiga mo‘ljallangan loyiha uchun uzoq muddatli ishlash ko‘rsatkichlari bo‘yicha qo‘shimcha ishonchni ta’minlaydi.
“Sarimay loyihasi O‘zbekistonda qayta tiklanuvchi energetikani rivojlantirish borasidagi ulkan maqsadlarning amaliy energetika infratuzilmasiga aylanayotganini ko‘rsatadi. Bunday miqyosdagi loyihalarda modullarning ishlash ko‘rsatkichlari butun tizim samaradorligiga bevosita ta’sir qiladi. Yuqori quvvat, bifatsial energiya ishlab chiqarish imkoniyati va uzoq muddatli ishonchlilik quyosh elektr stansiyasining o‘nlab yillar davomida samarali ishlashi uchun muhim omillardir”, — dedi Trinasolar Asia Pacific kompaniyasining Janubi-Sharqiy, Janubiy va Markaziy Osiyo bo‘yicha guruh rahbari Elva Wang.
“Vertex N texnologiyasi ushbu loyihani qo‘llab-quvvatlayotganidan faxrlanamiz. Kelgusida ham hamkorlarimiz bilan birgalikda O‘zbekiston va Markaziy Osiyoda yirik miqyosdagi quyosh energetikasini rivojlantirish yo‘lida faoliyatimizni davom ettiramiz.”
Trinasolar haqida
1997-yilda tashkil etilgan Trinasolar — aqlli quyosh energetikasi va energiya saqlash yechimlari bo'yicha jahon yetakchisi. Kompaniya yirik elektr stansiyalari, tijorat va sanoat obyektlari hamda uy xo'jaliklari uchun fotoelektrik modullar, energiya saqlash tizimlari, trekerlar va aqlli energetik yechimlarni ishlab chiqaradi. Trinasolar dunyoning 180 dan ortiq mamlakati va mintaqasida faoliyat yuritadi. Uzluksiz texnologik innovatsiyalar va global ishlab chiqarish salohiyati orqali kompaniya qayta tiklanuvchi energetikani rivojlantirish hamda karbon neytralligiga o'tishni qo'llab-quvvatlamoqda.
