Humo Air kompaniyasi matbuot xizmati fotosurati
O‘zbekiston hukumati Shveysariyaning ValleyRoad Capital investitsiya kompaniyasi bilan tuzilgan, unga ko‘ra xorijiy hamkor Humo Air aviakompaniyasini boshqarish huquqini olgan shartnomani bekor qildi. Yaqin vaqt ichida korxona davlat mulkiga qaytariladi va yana ochiq savdolarga qo‘yiladi. Bu haqda «Gazeta.uz» Markaziy Osiyo respublikasi Davlat aktivlarini boshqarish agentligi (DABA) ma’lumotlariga tayanib xabar berdi.
Nashrning yozishicha, 8 sentyabr holatiga ko‘ra, Korxonalar va tashkilotlarning Yagona davlat reyestrida Humo Air aksiyalari quyidagicha taqsimlangani ko‘rsatilgan: 51 foizi ValleyRoad Capital'ga, 49 foizi esa DABAga tegishli.
Biroq, agentlik jurnalistlarga investor bilan shartnoma allaqachon bekor qilinganini va aviakompaniya to‘liq ravishda O‘zbekiston davlat mulkiga qaytayotganini ma’lum qildi. Agentlik qo‘shimcha qilishicha, mulkchilik huquqlari rasmiy ravishda bir necha kun ichida qayta rasmiylashtiriladi.
Shuningdek, aviakompaniya 2026–2027 yillarda ochiq savdolarga qo‘yiladigan aktivlar ro‘yxatiga kiritilgani ma’lum. Xususiylashtirilishi lozim bo‘lgan davlat korxonalari ro‘yxati mamlakat prezidenti Shavkat Mirziyoyevning joriy yil 28 avgustdagi farmoni bilan tasdiqlangan. Hujjatda loukosterning 100 foizlik ulushi qachon va qanday sababga ko‘ra yana davlat tasarrufiga o‘tgani aytilmagan.
Shveysariyaning ValleyRoad Capital investitsiya kompaniyasi Humo Airni 2022 yil oxirida sotib olgan. O‘shanda xorijiy hamkorlar O‘zbekiston korxonasini to‘liq sotib olgani, bitim qiymati 27,2 milliard so‘mni (2,4 million dollar) tashkil etgani xabar qilingandi.
Shu bilan birga, investor bir qator majburiyatlarni, jumladan, samolyotlar parkini 18 ta havo kemasiga yetkazish majburiyatini olgan. Biroq bu rejalar amalga oshmay, qog‘ozda qolib ketgan. Aviakompaniya saytida joylashtirilgan ma’lumotlarga ko‘ra, uning parkida hozir bor-yo‘g‘i ikkita Airbus A320 samolyoti mavjud.
Bundan tashqari, kompaniya xalqaro bozorga chiqish bo‘yicha va’dasini ham bajarmagan. Avvalroq BAA, Qozog‘iston, Turkiya, Qatar, Ozarbayjon va Xitoyga aviaqatnovlarni yo‘lga qo‘yish rejalashtirilgan edi. Loukoster faqat O‘zbekiston shaharlari o‘rtasida reyslarni amalga oshirgan.
Humo Air saytidagi so‘nggi xabar 2024 yil 29 fevral sanasi bilan belgilangan. Unda korxona 10 martdan «qayta ishga tushirish» va xalqaro yo‘nalishlarni ochish munosabati bilan faoliyatini to‘xtatishi aytilgan. Aviakompaniya rahbariyati o‘sha yil aprel oyida faoliyatni qayta tiklashni va chiptalar narxini past darajada saqlab qolishni va’da qilgan. Biroq kompaniya hanuzgacha faoliyat yuritmayapti.
ℹ️ Humo Air 2020 yil yanvar oyida davlatga qarashli «Maxsus aviatsiya ishlari aviakompaniyasi» negizida tashkil etilgan. U loukoster sifatida pozitsiyalangan: O‘zbekiston Bosh vaziri Abdulla Aripovning so‘zlariga ko‘ra, dastlabki bosqichda Humo Air ichki reyslarni «amaldagi tariflardan ancha arzon narxlarda» amalga oshirishi kerak edi. Korxonaning ustav kapitaliga 43 ta An-2 samolyoti, aviatsiya dvigatellari, aviatsiya trenajyorlari va boshqa mol-mulk kiritilgan. 2022 yil oxirida Humo Air Shveysariyaning ValleyRoad Capital investitsiya kompaniyasi tomonidan xususiylashtirilgan.
