Igor Surov. TFF fotosurati
Rossiyalik mutaxassis Igor Surov Tojikistonning U-17 yoshlar terma jamoasi bosh murabbiyi etib tayinlandi. U jamoani 2026 yilda Qatarda bo‘lib o‘tadigan jahon chempionatiga tayyorlaydi. Bu haqda Tojikiston Futbol federatsiyasi matbuot xizmati xabar berdi.
40 yoshli Surov o‘z xohishiga ko‘ra lavozimni tark etgan Daler Kayosovning o‘rnini egalladi. Tojikiston terma jamoasi aynan Kayosov rahbarligida Osiyo U-17 kubogining chorak finaliga chiqib, jahon chempionati yo‘llanmasini qo‘lga kiritgan edi.
Surovning murabbiylar shtabiga Shamsiddin Kosimov, Jafar Ahmedov va Elchibek Rashidbekov kirdi. Darvozabonlarni tayyorlash uchun Umed Chorshanbiyev mas’ul bo‘ladi.
Eurasia Football aniqlik kiritishicha, Surov Tojikiston futboli bilan yaxshi tanish. 2017 yilda u Dushanbe SSKAsida futbolchi sifatida to‘p surib, jamoa bilan mamlakat chempionatining bronza medalini qo‘lga kiritgan. 2023 yilda rossiyalik murabbiy sifatida ushbu natijani takrorladi va Xo‘jandning «Esxata» klubini Tojikiston chempionatida klub tarixidagi ilk bronza medaliga olib keldi.
Avvalroq Surov Mongoliyaning «Sumid» klubi, Qirg‘izistonning «Bars» jamoasida ham ishlagan va uni chempionlikka olib kelgan. Shuningdek, u O‘zbekistonning «Mash’al» klubida faoliyat yuritgan. Surov 2026 yil fevral oyida «Mash’al» bosh murabbiyi bo‘lgan, ammo aprel oyi oxirida tomonlar o‘zaro kelishuvga ko‘ra shartnomani bekor qilgan.
U-17 jahon chempionati Qatarda 19 noyabrdan 13 dekabrga qadar bo‘lib o‘tadi. Tojikiston terma jamoasi F guruhida Senegal, Xorvatiya va Kuba bilan bahs olib boradi. Tojikiston jamoasi uchun bu 2007, 2019 va 2025 yilgi turnirlardan keyin yoshlar o‘rtasidagi jahon chempionatidagi to‘rtinchi ishtiroki bo‘ladi.
