Tojikiston-Hindiston o'yinidan lavha. TFF fotosurati
6 iyun kuni Tojikiston milliy futbol terma jamoasi makedoniyalik murabbiy Igor Angelovskiy qo'l ostidagi birinchi o'yinida g'alaba qozondi va o'rtoqlik o'yinida Hindistonni 3:1 hisobida mag'lub etdi.
Angelovskiy shu yil aprelь oyi oxirida Tojikiston terma jamoasini qabul qilgan. U 2027 yilgi Osiyo Kubogi saralash bosqichini muvaffaqiyatli yakunlaganidan so'ng jamoani tark etgan serbiyalik Goran Stevanovichning o'rnini egalladi.
Jamoa uzoq vaqtdan beri birinchi marta Tursunzodadagi «TALKO Arena»da o'ynadi.
Mezbonlar tezda ustunlikka erishdilar. 9-daqiqada Sheriddin Boboyev Ehsoni Panjshanbe tomonidan qo'lga kiritilgan penalьtini golga aylantirdi. Tanaffusdan so'ng mezbonlar hujumda davom etishdi. Mehrubon Karimov 62-daqiqada gol urdi, olti daqiqadan so'ng esa Panjshanbe hisobni yanada oshirdi. Hindiston faqat so'nggi daqiqalarda javob qaytardi: Farux Choudhari 89-daqiqada jarima zarbasini aniq amalga oshirdi.
O'yindan oldin Angelovskiy Hindistonga qarshi seriyada jamoadan fidoyilik, intizom va sifatli o'yin ko'rishni kutayotganini aytdi. Murabbiy shuningdek, milliy terma jamoa uchun muxlislarning qo'llab-quvvatlashi muhimligini ta'kidlagan.
Tojikiston va Hindiston o'rtasidagi ikkinchi o'rtoqlik o'yini 9 iyun kuni Hisor markaziy stadionida bo'lib o'tadi.
Hindistonga qarshi o'yinlar Tojikistonning 7 yanvardan 5 fevralgacha Saudiya Arabistonida bo'lib o'tadigan 2027 yilgi Osiyo Kubogiga tayyorgarlik doirasida amalga oshiriladi. Guruh bosqichida Tojikiston terma jamoasi Avstraliya, Iroq va Singapur bilan to'qnash keladi.
Igor Angelovskiy Shimoliy Makedoniya terma jamoasidagi faoliyati bilan mashhur. 2020 yilda u ularni birinchi marta Yevropa chempionatiga olib chiqqandi. Makedoniyaliklar turnirga to'g'ridan-to'g'ri saralash guruhidan emas, balki Millatlar Ligasi pley-off bosqichi orqali Gruziyani mag'lub etib, yo'lllanmani qo'lga kiritishgandi. Yevro chempionatining o'zida jamoa o'z guruhidagi uchta o'yinning barchasida — Avstriya, Ukraina va Niderlandiyaga yutqazgan. Niderlandiyaga qarshi mag'lubiyatdan so'ng, Angelovskiy bu uning bosh murabbiy sifatidagi so'nggi matbuot anjumani ekanini, chunki uning shartnomasi tugashi va u endi milliy terma jamoani boshqarmasligini aytgandi.
