t.me/aqorda_resmi sayti fotosurati
Qozog‘iston G‘azo sektoridagi Xalqaro barqarorlashtirish kuchlariga (ISF) qo‘shin va politsiya taqdim etadigan mamlakatlar ro‘yxatiga qo‘shildi. Bu haqda AQSh prezidenti Donald Tramp Falastin anklavida kelishuvga erishish uchun AQSh tashabbusi bilan tashkil etilgan Tinchlik kengashining birinchi yig‘ilishida ma'lum qildi, deb xabar beradi TASS.
«Albaniya, Kosovo, Qozog‘iston — ularning barchasi G‘azo sektorida barqarorlikni ta'minlash uchun qo‘shin va politsiya ajratishga va'da berishdi. Misr va Iordaniya ham katta yordam berib, qo‘shin ajratib, Falastin politsiya kuchlarini tayyorlashga ko‘mak bermoqda», — dedi Tramp Vashingtondagi nutqida.
Oldinroq, xuddi shu tadbir davomida u Qozog‘iston prezidenti Qosim-Jomart To‘qayevga ochiqchasiga minnatdorchilik bildirdi va Qozog‘istonni «ajoyib va boy mamlakat» deb atadi.
Tramp shuningdek, Qozog‘istonni G‘azoga yordam sifatida mablag‘ ajratgan mamlakatlar qatoridan o‘rin olganini aytdi. «Qozog‘iston, Ozarbayjon, BAA, Marokash, Bahrayn, Qatar, Saudiya Arabistoni, O‘zbekiston va Quvayt birgalikda yordam dasturiga 7 milliard dollardan ortiq mablag‘ ajratganini ma'lum qilishdan mamnunman. Bu ajoyib. Rahmat, do‘stlar», — deya OAV uning so‘zlarini keltiradi. Trampning so‘zlariga ko‘ra, AQSh «Tinchlik kengashi»ga 10 milliard dollar mablag‘ ajratadi.
Tramp 2026 yil 16 yanvarda «Tinchlik kengashi» tashkil etilganini e'lon qildi. Ushbu tashkilotning tashkil etilishi AQSh prezidentining G‘azo uchun tinchlik rejasining bir qismi bo‘lib, unda Falastin radikallarini qurolsizlantirish, Isroil qo‘shinlarini anklavdan olib chiqish, u yerga xalqaro barqarorlashtirish kuchlarini joylashtirish va sektorni boshqarish tuzilmalari ustida ishlarni boshlash ko‘zda tutilgan.
