TASS fotosurati
Rossiya hukumati kam daromadli migrantlarga patent berishdan yoki yangilashdan bosh tortish to‘g‘risidagi qonun loyihasini ma'qulladi, deb xabar beradi TASS.
9 fevral kuni qonunchilik faoliyati bo‘yicha hukumat komissiyasi Moliya vazirligi tomonidan ishlab chiqilgan chora-tadbirlar paketini ma'qulladi. Agar tasdiqlansa, Federal Soliq Xizmati (FSX) tizimida daromad ma'lumotlarining yo‘qligi yoki daromadi yashash minimumidan past bo‘lishi patent berishdan yoki uni yangilashdan bosh tortish uchun asos bo‘ladi.
«Rossiya Federatsiyasida ishlaydigan xorijiy fuqarolar o‘zlarini va Rossiya Federatsiyasida yashovchi va ularning qaramog‘ida bo‘lgan oila a'zolarini yashash minimumidan mintaqaviy koeffitsiyentga ko‘paytirilgan miqdorda ta'minlashlari shart», — deyiladi komissiya materiallarida.
Rossiya Yuristlar assotsiatsiyasi boshqaruvi raisi Vladimir Gruzdev «Izvestiya» nashriga bergan intervьyusida shu asos vaqtinchalik va doimiy yashash ruxsatnomalarini bekor qilishga imkon berishini tushuntirdi.
Cheklovlar barcha qaramog‘idagi shaxslar uchun belgilangan yashash minimumidan past daromadga ega bo‘lgan migrantlarga nisbatan qo‘llaniladi. Hisoblash uchun mintaqaviy koeffitsiyentni o‘z ichiga olgan maxsus formuladan foydalaniladi.
Bundan tashqari, agar patent egasi hisobot yilida Rossiyada o‘n oy yoki undan kam vaqt ishlagan bo‘lsa, patent muddati uzaytirilmaydi.
Soliq organlari chet elliklarning daromadlari to‘g‘risidagi ma'lumotlarni Ichki ishlar vazirligiga (IIV) yagona idoralararo elektron aloqa tizimi orqali yuboradilar. Hisobot davri uchun daromad sertifikatlari, soliq deklaratsiyalarining nusxalari va shaxsiy soliqlar to‘langanligini tasdiqlovchi hujjatlar tekshirish uchun qabul qilinadi.
Yangi qoidalar birinchi marta patent olish uchun ariza topshirgan yoki faqat jismoniy shaxslarning shaxsiy ehtiyojlari uchun ishlaydiganlarga taalluqli bo‘lmaydi.
Qonun loyihasi shuningdek, migrantlarning voyaga yetmagan farzandlarining mamlakatda yashashini tartibga soladi. Gruzdev chet el fuqarosi qaramog‘idagi har bir voyaga yetmagan bola uchun shaxsiy daromad solig‘i bo‘yicha oldindan to‘lov 50% ga oshirilishini ma'lum qildi. Uning ta'kidlashicha, bazaviy stavka tashkilotlar xodimlari va yakka tartibdagi tadbirkorlar uchun oyiga 1200 rubl va jismoniy shaxslarning shaxsiy ehtiyojlari uchun yollangan ishchilar uchun 1700 rublni tashkil qiladi.
18 yoshga to‘lgandan so‘ng, xorijiy fuqarolarning farzandlari 30 kun ichida Rossiyani tark etishlari yoki o‘zlariga patentlarni to‘liq narxda olishlari shart bo‘ladi.
Avvalroq, 2026 yil boshiga kelib, Rossiyadagi chet elliklar soni taxminan 10 foizga kamayib, 6,3 milliondan 5,7 milliongacha (2025 yil boshidagi ko‘rsatkichlarga nisbatan) kamaygani haqida xabar berilgan edi. O‘tgan yil oxirida Rossiya Davlat Dumasi majburiy tibbiy sug‘urta polislari faqat Rossiya Federatsiyasida besh yillik sug‘urta stajiga ega mehnat migrantilarga berilishini belgilovchi qonunni qabul qilgandi.
