14 yanvarga kelib, Eronda ommaviy norozilik namoyishlarida ishtirok etganlar orasida tasdiqlangan o‘limlar soni 2403 ga yetgan. Bu haqda Bu haqda Eronda inson huquqlari himoyasi va uning targ‘iboti bilan shug‘ullanuvchi HRANA (Human Rights Activists News Agency) guruhi xabar berdi.
O‘lganlar ro‘yxatidan 12 nafar voyaga yetmagan va norozilik namoyishlarida qatnashmagan to‘qqiz nafar tinch aholi o‘rin olgan. Bundan tashqari, 147 nafar xavfsizlik xodimi va Eron hukumati tarafdorlari halok bo‘lgan. Politsiya va harbiy kuchlar bilan to‘qnashuvlarda 1134 kishi og‘ir jarohat olgan.
Shu bilan birga, Iran International Eronda norozilik namoyishlarini bostirish paytida 12 000 kishi halok bo‘lganini da'vo qilmoqda. Tahririyat Oliy Milliy Xavfsizlik Kengashiga yaqin bo‘lgan manbadan, prezident devonidagi ikki manbadan, Mashhad, Kermanshoh va Isfahon shaharlaridagi Islom inqilobi qo‘riqchilari korpusi (IIQK) ichidagi ko‘plab manbalar hisobotlaridan, guvohlar va qurbonlarning oilalaridan, turli shaharlardagi shifokorlar va hamshiralardan olingan ma'lumotlarni ko‘rib chiqqandan so‘ng shunday xulosaga kelgan.
Iran International ma'lumotlariga ko‘ra, qotilliklarning aksariyati Eron internetni o‘chirib, ko‘pgina ommaviy axborot vositalari faoliyatini to‘xtatganidan so‘nggi ikki kecha — 8 va 9 yanvarь kunlari sodir bo‘lgan.
13 yanvarь kuni Bloomberg amerikalik biznesmen Ilon Maskning SpaceX kompaniyasi Eronda Starlink sun'iy yo‘ldosh xizmatini bepul qilganini xabar qildi. SpaceX hozircha bu ma'lumotni tasdiqlamadi.
HRANA ma'lumotlariga ko‘ra, o‘tgan yil 28 dekabrida boshlangan norozilik namoyishlari Eron bo‘ylab 187 shaharga tarqalgan. Mamlakat bo‘ylab jami 614 ta norozilik namoyishi qayd etilgan bo‘lib, ular Islom Respublikasining 31 viloyatini, ya'ni barcha hududlarini qamrab olgan.
Xavfsizlik kuchlari mamlakat bo‘ylab namoyishchilarni ommaviy hibsga olishmoqda. Bugungi kunga qadar 18 434 kishi hibsga olingani tasdiqlangan. Eron rasmiylari hibsga olinganlarning iqrornomalarini davlat televideniyesida efirga uzatishni boshlaganlar. Bunday ko‘rsatuvlarning to‘qson yettitasi qayd etilgan.
